Son zamanlar insanların əlində tez-tez balaca bir aparat görürük. Soruşanda elektron siqaret olduğunu deyirlər. Çəkənlərin fikrincə, bu aparat adi siqaretdən ziyansızdır və ondan siqareti tərgitmək üçün istifadə edirlər. Lakin son zamanlar yayılan məlumatlara görə, bu aparatlar heç də təhlükəsiz deyil. Hətta onların insanların əlində partlaması ilə bağlı da məlumatlar var. Bəs, əslində, elektron siqaret nədir? Həqiqətən də, deyildiyi qədər zərərsizdirmi?
Azad İstehlakçılar Birliyinin rəhbəri Eyyub Hüseynov "Sherg.az"a bildirib ki, Beynəlxalq istehlak təşkilatının verdiyi məlumata görə siqareti tərgitmək üçün bazara daxil olmuş “glo” və elektron siqaret deyilən mallar heç də siqareti tərgitməyə kömək etmir:
“Elektron siqaretlər tütün məmulatı olmadığı üçün dünya bazarında rahat şəkildə irəliləyir. Ona görə də nəzarət etmək çətin məsələdir. Çünki nə elektron, nə də ki, tütün məmulatıdır. Bir çox ölkələrdə tütün əleyhinə qəbul edilən qanunlar bunlara aid deyil. Yalançı alim və insanların təbliğatı altında bunlar irəli gedir. Ümumiyyətlə bu hadisələr yol verilməzdir. Ondan yaranan buxar insanlar üçün siqaretdən daha da zərərlidir. Məsləhətim odur ki, insanlar elektron siqaretlərə aldanmasınlar. Həmçinin də Azərbaycanda elektron siqaretlərin qaçaq mal variantı var. Lakin qaçaq mallar daha təhlükəlidir. Çünki onların mənşəyi bəlli deyil. Azad İstehlakçılar Birliyi, qaçaqmal elektron siqaretlərin qarşısını almaq üçün müəyyən yollar axtarır. Hətta illər boyu bunların açıq reklamı və bukletləri yayılıb. İnsanlar həm “glo”, həm də elektron siqaret istifadə etməkdən çəkinməlidir”.
