Son illərdə xüsusilə uşaqlarda daha tez-tez rast gəlindiyi ehtimal edilən diqqət dağınıqlığı və hiperaktivlik pozuntusu qadınlarda da olduqca yayğın imiş. Alimlərin apardığı tədqiqat qadınların tez-tez diqqət dağınıqlığına və hiperaktivlik pozuntusuna məruz qaldığını göstərib.
“Sherg.az” “Milliyet.com.tr”yə istinadən qadınlarda bunu göstərən 7 əlaməti qeyd edir. Birinci əlamət unutqanlıqdır. Qadınlar tez-tez diqqətsizlik, unutqanlıq, detallara diqqətsizlik kimi problemlər yaşayırlar. Araşdırmalar göstərir ki, bu vəziyyət qadınlarda daha çox stress və narahatlığa səbəb olur. İkincisi, daxili hiperaktivlikdir. Qadınlarda diqqət dağınıqlığının başqa bir fərqli xüsusiyyəti daxili narahatlıq vəziyyətidir. Ağıllarındakı narahatlıq, gün ərzində dəfələrlə nəzarəti itirmələrinə səbəb olur. Üçüncüsü, emosional dönüşlərdir ki, diqqət dağınıqlığı olan qadınlarda əhvalın dəyişikliyinə və depressiv əhvali-ruhiyyəyə səbəb ola bilər. Bir çox qadın diqqət dağınıqlığını emosional pozğunluqla qarışdıra bilər, lakin araşdırmalar göstərir ki, diqqətsizlik bilavasitə emosional balanssızlıqla bağlıdır. Dördüncü əlamət, qadınların tez-tez təşkilati və ya vaxtın idarə edilməsi məsələlərində çətinliklərlə üzləşməsidir. Bu zaman tapşırıqları vaxtında yerinə yetirməkdə və evdə nizam-intizamı qorumaqda problemlər yaranır. Beşincisi, ictimai münasibətlərdə çətinliklərdir. Diqqət dağınıqlığı sosial münasibətlərdə də çətinliklər yarada bilər. Simptomlar arasında sosial vəziyyətləri idarə etməkdə çətinlik, başqalarının hisslərini başa düşməkdə çətinlik və ya bəzən çox danışmaq meyli ola bilər. Qadınlar bu əlamətlərə görə anlaşılmazlıqlar yaşaya və nəticədə sosial izolyasiyaya meyl edə bilərlər. Altıncı əlamət özünə hörmətin aşağı səviyyəsidir. Bir çox qadın diqqət dağınıqlığı səbəbiylə yaşadıqları çətinlikləri şəxsi çatışmazlıqlar kimi qəbul edə bilir ki, bu da özünə inamın itirilməsinə səbəb olur. Yeddinci əlamət hiperfokusdur. Bu, müəyyən bir mövzuya və ya hadisəyə həddindən artıq kilidlənmək, qalan digər hər şeyə isə məhəl qoymamaq deməkdir. Bunun nəticəsində qadınlar bəzən vacib işləri unudur və ya görməzdən gəlirlər.
