“Niyə bu qədər məhsulları ziyan edirlər? Hansı haqla? nəyə görə bu qədər məhsulun vaxtı keçməlidir?”
İstehlaka yararsız 19 tondan çox qida məhsulu məhv edilib. Bu barədə Qida Təhlükəsizliyi Agentliyindən (AQTA) məlumat verilib. Bildirilib ki, “Sun Food” MMC-nin agentliyə müraciəti əsasında istehlaka yararsız və istifadə müddəti bitmiş, ümumi çəkisi 19,67 ton olan müxtəlif növ qida məhsulu “EkoSum” MMC-nin tullantıların zərərsizləşdirilməsi poliqonunda məhv edilib.
Vəziyyətlə bağlı “Sherg.az “ a danışan Qida təhlükəsizliyi üzrə ekspert Ağa Salamov bildirib ki, bu böyük bir israfçılıq deməkdir. Onun sözlərinə görə, müəssisələrə vaxtı keçmiş məhsullara əsasən bir başa cərimələr tətbiq olunmalıdır:
“Bu, tək qida israfçılığı deyil, insan əməyinin israfçılığıda hesab edilir. Çünki qidaların ərisəyə gəlməsində insan əməyinin böyük rolu var. Eyni zamanda bu hal maliyyə zərəri yaradır. Ortaya çıxan digər ziyan isə nəqliyyat xərcləridir. Bu qidaların saxlanılması üçün olan enerji itkiləri də hesablanmalıdır. Belə zərərlər yaradan müəssisələrə mütləq sürrətdə cəza verilməlidir. Yaranan vəziyyət yolverilməz məqamlardan biridir. Dünya aclıq və susuzluqla üz-üzəykən belə bir israfçılıq düzgün deyil. Niyə bu qədər məhsulları ziyan edirlər? Hansı haqla? nəyə görə bu qədər məhsulun vaxtı keçməlidir? Bu suallara belə cavab verirlər: “Özümüz bilərik, bazar iqtisadiyyatıdır və işbazıq”. Cavab ancaq bundan ibarətdir. Çünki onlara geniş imkanlar yaradılıb. Lakin bu o demək deyil ki, israf etməyə haqları var. Dünya israfçılığa qarşı mübarizə aparır . Bizdə isə vaxtı keçmiş qidaları məhv edirlər. Bununla bağlı bir proqram hazırlanmalıdır. Azərbaycanda belə bir addıma ehtiyac var. “Vaxtı keçib yox edin bitsin” olmalı deyil. Burda məhv olunan məhsulla yanaşı digər ziyanlarda mövcuddur. AQTA reydlər keçirib öyrənməlidir ki, niyə vaxtı keçir və israfçılıq yaranır? Nəzərə alınıb ciddi yanaşılmalı məqamlarda biridir. Normadan artıq qida məhsulları istehsal olunmamalıdır ki, israfçılıq yaranmasın”.
Ekspert sonda onu da qeyd edib ki, israf etmək günahdır. Yaxşı bir gələcək üçün qənaət və diqqət etməyi bacarmalıyıq. İsraf etməklə heç bir uğur əldə edə bilmərik.
Şərqiyyə Nəbi
