Enerji içkiləri bu gün dünyada ən çox satılan içkilər qrupuna daxil olsa da, mütəxəssislər satışı kifayət qədər geniş miqyas alan, hər yerdə sərbəst satılan bu içkilərin insan orqanizmi üçün ciddi təhlükə mənbəyi olduğu qənaətindədir.
Artıq neçə illərdir Azərbaycan bazarına da yol tapan enerji içkiləri uşaqdan böyüyə qədər heç bir məhdudiyyət qoyulmadan hər kəsə satılır. Halbuki mütəxəssislərin sözlərinə görə, ishehsal zamanı orqanizmi stimulyasiya edən maddələrdən istifadə olunduğundan bu içkilər insanın istər psixoloji durumuna, istər ürək-damar sisteminə, istərsə də normal maddələr mübadiləsinə mənfi təsir göstərir.
Uzman mama-ginekoloq Rəşad Sultan “Sherg.az”a bildirib ki, uşaq məsələsi Azərbaycanda hər ailə, hər insan üçün prioritet olduğuna görə həyat övlad sahibi olmaq üzərində qurulub:
“Övlad sahibi olmayan şəxslərə də sanki ölmüş kimi baxırlar. Ona görə də bütün reklamlar, qadağalar və kampaniyalarda bunun üzərindən aparılır. Hətta koronavirus vaxtı belə bir plakat var idi ki, toylara getmək istəyirsənsə, peyvənd vurdur get. Ona görə də kim nəyi pisləmək istəyirsə, deyir ki, onu eləmə uşağın olmaz. Bu enerji içki məsələsi də yəqin ki, həmin məsələdəndir. Enerji içkisinin tərkibində kafein, taurin və digər enerji verən maddələr var. Bunların nə yumurtalığa, nə də ki, kişi cinsiyyət orqanlarına təsiri sübut olunub. Ona görə də bu kimi fikirlər yalnışdır. Ümumiyyətlə, insan bir söz deyərkən informasiya mənbəyini göstərməlidir, hələ bu elmi bir sözdürsə. Elm tamamilə informasiyadan və mənbəyindən ibarətdir. Enerji içkiləri içənlərin uşağı olmur fikri tamamilə yanlış informasiyadır. Belə bir elmi məlumat yoxdur”.
