ABŞ-dən olan jurnalisti Bob Vudvordun bu həftə nəşr olunan kitabında COVİD testi iddiası Kreml tərəfindən təsdiqlənib.
Sherg.az xəbər verir ki, kitabda iddia olunur ki, ABŞ-nin keçmiş prezidenti Donald Tramp epidemiyanın ilkin mərhələsində, testlərin demək olar ki, tükəndiyi bir vaxtda Rusiya prezidenti Vladimir Putinə COVİD testləri göndərib.
Kremlin sözçüsü Dmitri Peskov Vudvordun Trampın ABŞ-də çatışmazlıqlara baxmayaraq, Rusiya liderinə şəxsi istifadəsi üçün gizli şəkildə testlər göndərdiyi barədə xəbərini böyük ölçüdə təsdiqləyib.
Peskov bildirib ki, epidemiyanın ilkin mərhələsində, kifayət qədər avadanlıq olmadığı zaman, bütün ölkələr bir növ öz aralarında mübadilə etməyə çalışıblar.
Vudvordun kitabına görə, Rusiya lideri Putin Trampa “İstəmirəm ki, kimsə bilsin, çünki insanlar sənə qəzəblənəcək” deyib.
Kitabda həmçinin iddia edilib ki, Tramp və Putin 2021-ci ildən bəri yeddi dəfə telefonla danışıblar. Lakin Peskov bu iddianı təkzib edib və danışıqların “baş tutmadığını” bildirib.
