Stomatoloji kabinetlərlə bağlı müraciət daxil olsa, yoxlamalar aparılacaq.
Bunu jurnalistlərə açıqlamasında səhiyyə naziri Teymur Musayev bildirib.
"Kimsə mətbəxdə diş çəkdirirsə, nazirlik buna heç nə edə bilməz", - nazir deyib.
Eyni zamanda, səhiyyə naziri qeyd edib ki, İcbari Tibbi Sığorta üzrə Dövlət Agentliyi, TƏBİB və Səhiyyə Nazirliyi bölgələrdə həkim çatışmazlığının aradan qaldırılması üçün vahid strategiya hazırlayır.
Professor Adil Qeybulla “Sherg.az”a deyib ki, bu cür problemlərin həll yolu akkreditasiya sisteminin yaradılmasıdır:
“Akkreditasiya sistemi o deməkdir ki, həkimlər baza tibb təhsili aldıqdan sonra sənədlərini Akkreditasiya Komissiyasına təqdim edirlər. Orada isə sənədlər təfsilatı ilə yoxlanılır və fəaliyyət lisenziyası verilir. Ümumiyyətlə hər bir həkim lisenziya əsasında çalışmalıdır. Həmçinin pasient istədikdə həkimin lisenziyasına baxmalı, lisenziya nömrəsi Səhiyyə Nazirliyinin reyestrində qeydə alınmalıdır. Çıxış yolu ancaq budur. Bu cür seçim olmadıqda, əlbəttə, istifadə etmə halları artacaq. Nəinki plastik cərrah, stomatologiya hətta gəlirli sahələrin hamısında korporativ maraq mövcuddur. Biz elə yol ilə getməliyik ki, tibbə korporativ marağın daxil olmasına şans qalmasın”.
