Bir il ərzində Avropa sanksiyaları Rusiyada maliyyə gərginliyinə və ticarətdə xərclərin artmasına səbəb olub.
"Report" "RBC-Ukrayna"ya istinadən xəbər verir ki, bunu Aİ-nin xarici işlər və təhlükəsizlik siyasəti üzrə ali nümayəndəsi Josep Borel deyib.
O, vurğulayıb ki, Ukraynaya qarşı müharibə başlayandan indiyədək Avropa İttifaqı Rusiyaya qarşı 11 sanksiya paketi tətbiq edib. Bundan əlavə, Avropa İttifaqı Rusiyadan olan 1 500-dən çox insan və 250-yə yaxın təşkilatı məhdudiyyətlər siyahısına salıb.
Borelin sözlərinə görə, Rusiya iqtisadiyyatı ötən il 2,1 % azalıb. O cümlədən, ötən ilin müvafiq dövrü ilə müqayisədə avtomobil istehsalı 48, digər nəqliyyat avadanlıqlarının istehsalı 13, kompüter, elektronika və optika istehsalı 8 faiz azalıb.
Ali nümayəndə qeyd edib ki, 2021-ci illə müqayisədə Aİ-nin Rusiyadan ümumi idxalının 58 %-i 2022-ci ildə artıq dayandırılıb: enerji məhsullarının idxalı demək olar ki, 60 % azalıb. 2023-cü ilin birinci rübündə bu rəqəm 75 %-dən çoxdur.
