Ukrayna, Moldova, Gürcüstan, Azərbaycan, Şərqi Avropa, Yaxın Şərq və Mərkəzi Asiyanın bir sıra ölkələrində müxtəlif əməliyyatlara cəlb edilmiş Fransa xüsusi xidmət orqanlarının geniş agentura şəbəkəsi Azərbaycanda ifşa olunub.
Bu barədə Qərb mətbuatında məlumat yayılıb.
Bildirilib ki, hər şey Fransa səfirlik daxili rezidenturasının Azərbaycan ərazisində əslində Fransanın “tərəfdaşı” kimi bilinən ölkələrin nümayəndələrinə qarşı çox arxayın kəşfiyyat əməllərinə görə diqqətə düşməsi ilə başlayıb.
Geniş əlaqələrindən istifadə edən rezidentura region ölkələrində fəal hərəkət etməklə yeni məqsədlər formalaşdırmaq və təsir dairəsini genişləndirməklə məşğul olub.
Məlumata görə, mənbələrdən əldə edilmiş informasiyaya əsasən, araşdırma bir-biri ilə əlaqəli xüsusatlar şəbəkəsini aşkarlamağa imkan verən çox maraqlı aspektləri üzə çıxarıb, uzun illər Fransa casus şəbəkəsinin ştatdankənar əməkdaşı olmuş Fransa vətəndaşlarından biri könüllü olaraq Azərbaycan hüquq-mühafizə orqanları ilə əməkdaşlığa təşəbbüs göstərib.
Müəyyən müddət ərzində bir qismi indi və ya əvvəllər Azərbaycanda xidmət etmiş, bəziləri müxtəlif ölkələrdə və nüfuzlu beynəlxalq təşkilatlarda örtülü işi davam etdirən onlarla Fransa xəfiyyəsi aşkarlanıb. Bununla yanaşı, Azərbaycan xüsusi xidmət orqanlarına Fransa rezidenturasının Cənubi Qafqaz, Yaxın Şərq, Ukrayna və Moldovadakı fəaliyyətinə dair dəlil və sənədlər təqdim edilib.
Azərbaycan xüsusi xidmət orqanları tərəfindən istintaq olunan cinayət işi üzrə Ukrayna, Gürcüstan və Azərbaycanla əlaqədar kəşfiyyat fəaliyyətini həyata keçirən bir sıra şəxs həbs olunub, bəziləri isə istintaq altındadır.
Mənbə hesab edir ki, uğursuzluğun miqyası Fransa kəşfiyyatının imicinə tarixi zərbə olacaqdır.
Azərbaycan tərəfi məsələ ilə bağlı hələ ki rəsmi açıqlama verməyib.
Bununla yanaşı, hazırda yayılan xəbərlərdə o da bildirilir ki, Fransa Prezidenti Emanuel Makron dünən Fransa Xarici Təhlükəsizlik Baş İdarəsinin (DGSE) rəisi Bernar Emyeni vəzifəsindən azad edib. Bernar Emyenin mümkün istefası barədə kəşfiyyatın Afrika və Cənubi Qafqaz sahələrindəki uğursuzluğundan sonra danışılmağa başlanılıb.
Daxili Təhlükəsizlik Baş İdarəsinə (DGSİ) rəhbərlik etmiş Nikolas Lerner isə Xarici Kəşfiyyat strukturuna yeni rəhbər təyin edilib.
Məsələ ilə bağlı “Sherg.az”a danışan təhlükəsizlik üzrə ekspert Rəşad Rza bildirib ki, hazırda bu haqqda rəsmi açıqlama olmadığı üçün sözügedən mövzuda konkret nəsə demək yalnış olar:
“Amma ümumən məsələni analiz etsək, ilk öncə erməni idealogiyasının banilərindən birinin Fransa olduğunu deməliyik. Həmçinin Fransa üçün Cənubi Qafqazda gedən proseslər hər zaman çox maraqlı olub. Agentura şəbəkəsinin aşkarlanmasına gəldikdə rəsmi məlumat olmadığı üçün bunun istədikləri istiqamətə yönləndimək üçün bilincli yayılmış məlumat ola bilmə ethimalını da diqqətdə saxlamaq lazımdır. Eyni zamanda həqiqi agentura da ola bilməsi mümkündür. İstənilən halda onların aşkar olunması Azərbaycanın güc strukturunun uğurudur. İran agenturası imkansız, kasıb insanları ələ almağa çalışırdı. Fransa agenturası isə onlardan fərqli olaraq əsasən misyonerlər vasitəsilə tapşırıqları yerinə yetirir. Azərbaycanda da onların fəaliyyətləri var və bu yöndədir. Aşkarlanması təbii ki, müsbət haldır”.
