Rusiyanın nəinki Yaxın Şərqdə, heç Cənubi Qafqazda da əvvəlki kimi gücü qalmayıb
Rusiya Xarici Kəşfiyyat Xidmətinin direktoru Sergey Narışkin bildirib ki, Rusiya Yaxın Şərqdə son dərəcə nüfuzlu oyunçu olaraq qalır. Onun sözlərinə görə, Moskva bu regionda mövqeyini itirməyib. Narişkin bildirib ki, Rusiya Yaxın Şərqdə təsiredici oyunçudur, ərəb dünyası və Türkiyə də bunu anlayır: "Ona görə də Rusiyanın Yaxın Şərqdəki mövqeyini itirməsi kimi bir məsələ yoxdur". Xatırladaq ki, bundan əvvəl xarici işlər naziri Sergey Lavrov da Rusiyanın Yaxın Şərqi tərk etmədiyini vurğulamışdı.
Politoloq Azər Qasımov "Sherg.az"a açıqlamasında deyib ki, Rusiya həmişəki kimi özünü "sındırmaq" istəmir. Ekspertə görə, Suriyanın yeni rəhbərliyi ilə Rusiyanın Tartus və Xmeymində hərbi bazalarının yerləşməsi üçün razılıq əldə edilmədiyi bildirilir:
"Rusiya Əsəd rejimi ilə 500 milyon dollar icarə haqqı barədə müqavilə imzalasa da, buna əməl etməyib. Suriyanın yeni Dəniz Sərhəd Xidməti də Rusiyaya ərazini tərk etmək göstərişi verib. Rusiyanın nəinki Yaxın Şərqdə, heç Cənubi Qafqazda da əvvəlki kimi gücü qalmayıb. Rusiyanın bölgədə heç bir gücü yoxdur və bundan sonra olması ehtimalı azdır. Ümumiyyətlə, Rusiya Yaxın Şərqdə təmsil olunmur. Hansısa proksi qruplarla əlaqəsi ola bilər, amma bunun region üçün əhəmiyyətli təsiri yox səviyyəsindədir. Suriya elə bir strateji ərazidir ki, oradan bütün Yaxın Şərqə nəzarət etmək olurdu. Bu bölgədən Afrikaya da nəzarət etmək imkanları var. Rusiyanın isti dənizlərə çıxmaq arzusu isə hələlik əldən çıxıb".
