Kollektiv Təhlükəsizlik Müqaviləsi Təşkilatının (KTMT) Baş katibi İmanqali Tasmaqambetov təşkilatın Minsk sammitindən sonra İrəvana səfər edəcək.
Bu barədə Belarus xarici işlər naziri Sergey Aleynik məlumat verib.
O bildirib ki, Tasmaqambetov İrəvana sammitin yekunlarına görə səfər edəcək:
“Minskdə razılıq komissiyası çərçivəsində yekunlaşdırılan bütün qərarlar erməni həmkarımıza təhvil veriləcək. Biz onların da bu qərarlara qoşulacağına inanırıq”.
Sözügedən məsələ ilə bağlı "Sherg.az"a danışan siyasi şərhçi Mübariz Göyüşlü söyləyib ki, KTMT və Rusiya başda olmaqla onun üzvləri Ermənistanın hələki nazı ilə oynayırlar:
"Görünür ki, bütün çalışmalar Ermənistanın bu qrumdan çıxma fəaliyyətini dayandırmaqdan ibarətdir. Bildiyimiz kimi Ermənistan KTMT ilə münasibətləri soyudub. Eyni zamanda təşkilatın iclaslarına qatılmır və toplantıların Ermənistanda keçrilməsinə də razılıq vermir. Yəni KTMT-nin bir üzvü olaraq üzərinə düşən öhdəlikləri yerinə yetirmir. Amma KTMT xüsusilə də, Rusiya buna səbr və dözüm göstərir. Həmçinin, Ermənistanın təşkilatda üzvlüyünün davam etməsinə çalışırlar".
Analitik qeyd edib ki, səfər zamanı Ermənistanın dırnaqarası narahatlıqlarının müzakirə olunması gözlənilir:
"KTMT bu məsələləri müzakirə edərək Erəmistanı bəhanələrini kəsməyə çağıracaq və qurumda qalması üçün cəhd göstərəcək. Ermənistan hakimiyyəti nə KTMT-nin baş katibinin, nə də ona aid hansısa bir təmsilçinin İrəvana səfər etməsini xoş qarşılamır və arzu etmir. Nikol Paşinyan hakimiyyəti özü müraciət etmədən təşkilatda fəaliyyətinə xitam verilməsini istəyir. Ona görə də bu səfər Ermənistan tərəfindən arzu olunan şəkildə qiymətləndirilməyəcək. Ermənistan artıq Qərbdəki havadarlarından təlimatlar alıb. Həmin göstərişlər Ermənistanın KTMT və Rusiya ilə bağlı bütün məsələlərə son qoymasıdır. Belə olan halda isə KTMT və Rusiyanın cəhdləri nəticə verməyəcək".
