“Dünyada və Avropada çətin vəziyyət fonunda Azərbaycan və Ermənistan arasında baş verən son hadisələr ümidverici olmaqla yanaşı, həm də qürur doğurur.”
APA-nın Nyu-Yorka ezam olunmuş əməkdaşı xəbər verir ki, bunu Gürcüstanın sabiq xarici işlər naziri Eka Tkeşelaşvili Azərbaycan mediasına açıqlamasında bildirib.
Tkeşelaşvili Prezident İlham Əliyevin liderliyinin bütün dünyada yüksək qiymətləndirildiyini deyib.
“Azərbaycan Prezidentinin müdrikliyi, strateji baxışı və illərlə davam edən münaqişənin sülh yolu ilə həllinə göstərdiyi qətiyyətli iradəsi olmasaydı, bu gün də bölgədə “dondurulmuş münaqişə” davam edə bilərdi. Amma indi isə həm azərbaycanlılar, həm də ermənilər üçün sülh və gələcək əməkdaşlıq perspektivi yaranıb. Prezident İlham Əliyevin liderliyi həlledici rol oynayır. Bu, tamamilə yeni regional dinamikaya yol açır və Cənubi Qafqazı Orta Asiya ilə sıx şəkildə birləşdirir”, - o deyib.
Sabiq XİN rəhbəri ümid edir ki, bu proses uğurla davam edəcək və Zəngəzur dəhlizi də daxil olmaqla gələcək əməkdaşlıq xətləri reallığa çevriləcək:
“Bu, nəqliyyat imkanlarının şaxələnməsinə, iqtisadi rifahın isə yalnız Azərbaycan və Ermənistan üçün deyil, bütün region xalqları, o cümlədən Orta Asiya ölkələri və Xəzəryanı dövlətlər üçün fayda gətirməsinə şərait yaradacaq”.
Diplomat onu da qeyd edib ki, bəzi xarici qüvvələr prosesin bu qədər müsbət və müstəqil olmasını istəmir.
“Amma Azərbaycan və Ermənistanın nümayiş etdirdiyi siyasi iradə və suveren mövqe sülhün reallaşmasına imkan verəcək. Burada beynəlxalq dəstək də çox vacibdir. Ona görə də həm region ölkələrinin iradəsi, həm də beynəlxalq dəstək birlikdə sülhün qorunması üçün mühüm “siper” rolunu oynaya bilər”, - o əlavə edib.
