Bəzən də olur ki, bəzi kişilər ətrafda hər kəs bildiyi üçün həyat yoldaşı tərəfindən döyüldüyünü etiraf edir
Ötən il Azərbaycanda 58 kişi gender əsaslı zorakılığa məruz qalıb.
Bununla bağlı məlumat Ailə, Qadın və Uşaq Problemləri üzrə Dövlət Komitəsinin 2024-cü il üzrə hesabatında öz əksini tapıb.
Bildirilib ki, 2024-cü ilin yanvar-dekabr aylarında 860 Gender əsaslı zorakılıqla bağlı Dəstək Xəttinə 330 müraciət daxil olub. Onlardan 58-i kişi, 272-si isə qadınlar tərəfindən edilib.
Mövzu ilə bağlı "Sherg.az"a danışan sosioloq Lalə Mehralı söyləyib ki, ailədə zorakılıq hallarından danışanda zorakılığı birmənalı olaraq kişilərin tətbiq etdiyini düşnürük:
“Amma bəzən əksi də olur. Kişilik artıq uzun illərdir ki, sosial tədqiqatlarda araşdırılmayan, ictimai mövzularda toxunulmayan, müzakirə edilməyən qavram olub. Hətta gender tədqiqatları qadınlar üzərində cəmlənir, daha çox qadın hüquqları müdafiə edilir. Halbuki gender bərabərliyi və haqları hər iki cinsin üzərində eyni dərəcədə təmin edilməlidir. Qadınların zorakılıq görmədiyi hallarda belə cəmiyyətdə “qurban” mövqeyində olması, kişilərin güclü təqdimatı səbəbi ilə istər-istəməz zorakılıq göstərən tərəf kimi qələmə verilməsini normallaşdırılıb. Cəmiyyət unudur ki, gender anlayışı təkcə qadınların yox, həm də kişilərin haqlarının müdafiəsi, bərəbərliyinin təminatı deməkdir. Etiraf etməsələr də bəzən onlar da döyülür, söyülür, təhqir edilir. Bir neçə ildir ki, statistik məlumatlarda kişilərin zorakılıq qurbanları olması ilə bağlı rəqəmlər də əks olunur. Adətən kişilər ailədə zorakılıq gördüyünü etiraf etmirlər, çünki bu, ətrafın stiqmasına səbəb olur. Amma bəzən də olur ki, bəzi kişilər ətrafda hər kəs bildiyi üçün həyat yoldaşı tərəfindən döyüldüyünü etiraf edir. Kişilərin zorakılıq görməsinin başqa səbəblər də var. Bunlar maddi vəziyyətin zəifyiyi, psixoloji durum, həyatından narazı olması və.s dir. Bizim cəmiyyətdə əvvəllər kişinin zorakılığa məruz qalması nadir müşahidə edilsə də, artıq sıradan, adi bir hala çevrilib. Düzdür, onlar qadınlar kimi döyülmür, işgəncəyə məruz qalmır, daha çox mənəvi zorakılığa məruz qalırlar. Amma zorakılıq elə zorakılıqdır, fiziki, mənəvi, psixoloji, iqtisadi – hansı cür olursa olsun. Zorakılığa məruz qalan da, zorakılığı tətbiq edən də kim olursa-olsun, hansı cinsdən olursa olsun, qınanılmalı, stiqmaya məruz qoyulmalıdır”.
