Dövlət Sərhəd Xidmətinin məlumatına əsasən 2024-cü ilin yanvar ayında Azərbaycan Respublikasına dünyanın 152 ölkəsindən 165,8 min və ya əvvəlki ilin müvafiq dövrü ilə müqayisədə 39,3 faiz çox əcnəbi və vətəndaşlığı olmayan şəxs gəlib.Dövlət Statistika Komitəsindən verilən xəbərə görə, gələnlərin 27,5 faizi Rusiya Federasiyası, 19,8 faizi Türkiyə, 9,7 faizi İran, 6,1 faizi Hindistan, 4,9 faizi Gürcüstan, 3,5 faizi Səudiyyə Ərəbistanı, 2,9 faizi Qazaxıstan, 2,7 faizi Birləşmiş Ərəb Əmirlikləri, 2,5 faizi Pakistan, 2,4 faizi Küveyt, 2,0 faizi Özbəkistan, 1,8 faizi Oman, 1,5 faizi Türkmənistan, 1,3 faizi Ukrayna, 1,0 faizi Belarus, 10,4 faizi digər ölkələrin vətəndaşları olub. Gələnlərin 74,2 faizini kişilər, 25,8 faizini qadınlar təşkil edib.
Maraqlıdır, bu ay göstəricinin artmasının səbəbi nədir? Ümumiyyətlə, daha çox əcnəbi cəlb etmək üçün hansı addımlar atılmalıdır?
Məsələni dəyərləndirən turizm məsələləri üzrə ekspert Ceyhun Aşırov "Sherg.az"a bildirib ki, statistika turizmin əvvəlki dövrünə qədəm qoyduğunu bir daha sübut edir:
"Dünya üzrə 2022-ci ildə təxminən 70 faizə yaxın, 2023- cü ildə 95 faiz turizm bazarı bərpa olunub. Azərbaycan bu göstəricilərdən geri qalsa da, artım müşahidə olunur. Bu gözlənilən vəziyyət idi. Azərbaycanda quru sərhədlərin qapalı olduğuna görə, hava yolu ilə uçuşların sayı artır. Bu səbəbdən bilet qiymətləri optimallaşdırılsa, gediş-gəliş daha çox olar. İstənilən halda nəqliyyat qiymətləri turizm paketlərinin içərisində xüsusi əhəmiyyətə malikdir. Yəni, başqa yerlərə səfər etmək üçün əsas səbəblərdən biri də həmin ölkənin əlçatanlılığıdır. Burda tək viza prossedurlarının sadə yolla əldə edilməsi deyil, eyni zamanda nəqliyyatın daha uyğun qiymətə ərsəyə gəlməsidir. Ona görə də bu sahədə tədbirlər genişləndirilməlidir. Artıq bir neçə ölkədə viza ləğv olunub, prosses sadələşdirilib. Bu qərar daha çox ölkəni əhatə etməlidir. Çünki əsas hədəf bazarlarından Azərbaycana gəlişi təmin etmək üçün viza ləğv olunmalıdır. Ona görə ki, viza rüsumu o dərəcə də gəlir gətirmir. Əslində turizm fəaliyyəti xidmət ixracı hesab olunur və nəticə olaraq ölkəyə xarici valyuta daxil olur".
