Bakıda həkim xəstənin yaxınları tərəfindən döyülüb.
"Report" xəbər verir ki, hadisə paytaxtın Suraxanı rayonunda qeydə alınıb.
Belə ki, çağırışa gedən həkim Mətin Arif oğlu Səmədov xəstənin yaxınları tərəfindən döyülüb.
Yaralı müxtəlif dərəcəli xəsarətlərlə xəstəxanaya çatdırılıb. Müayinə zamanı ona döş qəfəsinin küt travması diaqnozu qoyulub.
Faktla bağlı araşdırma aparılır.
Mövzu ilə bağlı "Sherg.az"a danışan sosioloq Lalə Mehralı söyləyib ki, bu vəziyyət insanların nə qədər psixoloji gərginlik altında yaşadığının göstəricisidir:
“Bir cəmiyyətdə ki, insanlar həkimlərə belə hücum edirlərsə, bu o deməkdir ki, artıq nə dözümlülük, nə empatiya, nə də başqasının fikrinə hörmət qalıb. Yəni bütün hallarda insanlar, aqressiya ilə yüklənib. Hamı aqressiyasını başqasının üstünə boşaltmağa hazırlaşır. Həkimlər və müəllimlər aqressiyaya ən çox məruz qalan insanlardır. Çünki insanlarla çox işləyirlər. Mən hətta şahidi olmuşam ki, anadangəlmə bağırsaq çıxışı olmayan uşağa görə ata ginekoloqu döyüb ki, "sən yaxşı ginekoloq olsaydın, doğuş prosesində mənim uşağımın bağırsaq çıxışı qaydasında olardı". Təsəvvür edin ki, insan bunun anadangəlmə vəziyyət olduğunu dərk etmir. Yəni bu proses doğuşda olmayıb, insanın ana bətnində anomaliya ilə inkişaf etməsi və anomaliya ilə doğulması deməkdir. Ehtimal edirəm ki, burada da həkimin döyülməsində, onun günahı yoxdur. Sadəcə həmin an insan o qədər aqressiv, o qədər dözümsüz olur ki, mütləq qaydada əsəbini başqasından çıxarmaq ehtiyacı hiss edir. Metroda, avtobusda, səkidə, və hər yerdə bu cür insanlar var. Tək həkimlərə qarşı deyil. Onlar bir himə bənddirlər ki, başqasına qarşı güc tətbiq eləsinlər, zorakılıq göstərsinlər".
