Türkiyə Təhsil Nazirliyinin atdığı bu addım təqdirəlayiqdir
Xəbər verdiyimiz kimi, Türkiyədə "Orta Asiya" ifadəsi "Türküstan" olaraq dəyişdirilib. Bu barədə Türkiyənin Milli Təhsil Nazirliyi məlumat yayıb. Bildirilib ki, ölkənin tarix kurikulumunda dəyişiklik ediləcək və “Orta Asiya” ifadəsi “Türküstan” termini ilə əvəzlənəcək. Ekspertlər hesab edirlər ki, bu qərar gələcək nəsillərdə milli kimliyin, vətənpərvərlik hissinin gücləndirilməsinə yönəlib.
AMEA-nın Fəlsəfə və Sosiologiya İnstitutunun Türk xalqlarının fəlsəfi fikir tarixi və müasir fəlsəfəsi şöbəsinin rəhbəri, türkoloq-alim Faiq Ələkbərli "Sherg.az"a deyib ki, coğrafiya və yer adlarının müxtəlif şəkildə adlandırılmasına çox rast gəlinir və bu da təsadüfi deyil. Alim vurğulayıb ki, Türküstan adı türk toplumları üçün daha doğmadır:
"Onsuz da Orta və Mərkəzi Asiya coğrafiyası uzun zaman Türküstan adlandırılıb. Türküstan bölgəsi yalnız Xəzərin şərq tərəfi deyil, həmçinin Xəzərin qərb tərəfi, yəni Azərbaycan bölgəsi də Türküstan adlandırılıb. Güney Azərbaycan da Türküstandır. Yaxud daha geniş anlamda Turan adlandırılıb. Tarixən də Turanın əsas bölgəsi məhz bütöv Azərbaycan olub. Hər halda Türkiyə Təhsil Nazirliyinin atdığı bu addım təqdirəlayiqdir. Bəzi bölgələrin qitələrə, konkret coğrafiyalara uyğun adlandırılması doğru yanaşma deyil. O baxımdan "Orta Asiya" yox, Türküstan daha doğru ifadə şəklidir. Tarixi adların bərpası əhəmiyyətlidir. Ümid edirik ki, Azərbaycan və digər türk dövlətləri də bənzər addımlar atacaqlar".
