“Bu, şəhid və qazilərimizin övladlarına olan qayğının yeni təzahürüdür”
Ali məktəblərə qəbul imtahanlarının bütün mərhələləri şəhid və qazi övladları üçün pulsuz olacaq. Baş nazir Əli Əsədov bununla bağlı qərar imzalayıb.
Qərara əsasən, aşağıdakı şəxslərə münasibətdə müsabiqədə iştirak üçün ödəniş dövlət büdcəsinin vəsaiti hesabına həyata keçiriləcək:
- ilk dəfə orta ixtisas təhsili müəssisələrinə tələbə qəbulu ilə bağlı imtahanda iştirak üçün müraciət etmiş abituriyentlər;
- ilk dəfə ali təhsilin bakalavriat (tibb təhsili üzrə əsas təhsil) səviyyəsinə tələbə qəbulu ilə bağlı imtahanda iştirak üçün müraciət etmiş abituriyentlər;
- Azərbaycan Respublikasının ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar əlilliyi müəyyən edilmiş şəxslərin uşaqları;
- şəhid ailəsinin üzvləri;
- valideynlərini itirmiş və valideyn himayəsindən məhrum olmuş uşaqlar;
- məcburi köçkün statusu olan şəxslər;
- I və II dərəcə əlilliyi müəyyən edilmiş şəxslər, o cümlədən sağlamlıq imkanları məhdud 18 yaşınadək uşaqlar.
Təhsil üzrə mütəxəssis Nadir İsrafilov qərarla bağlı fikirlərini “Sherg.az”a bildirib. Ekspert hesab edir ki, Nazirlər Kabinetinin müvafiq qərarı təhsil sahəsində görülən müsbət işlərin davamıdır:
“Sözügedən qərar bir daha göstərir ki, təhsil dövlətin prioritet sahəsidir və dövlətimiz təhsilin əlçatanlığını təmin etmək üçün bütün mövcud imkanlarını səfərbər edir. Bu qərar 30 illik həsrətə son qoyulmasında, Azərbaycanın ərazi bütövlüyünün təmin edilməsində, müstəqilliyimizin müdafiəsində canını və sağlamlığını qoyan şəhid və qazilərimizin övladlarına olan diqqət və qayğının yeni təzahürüdür. Ölkə başçısının da xüsusi olaraq vurğuladığı kimi, bu gün Birinci və İkinci Qarabağ müharibəsi şəhidlərinin xatirəsini əbədiləşdirmək, daim qəlbimizdə saxlamaq üçün böyük işlər görülür və görülməlidir”.
