Sosial şəbəkələrdə Rusiya ordusunun zəbt etdiyi Ukrayna şəhərlərindəki mağazalara, supermarketlərə hücüm etdiyini əks etdirən videogörüntülər yayılıb. Hətta video süjetlərin birində rus əsgərin 90 - cı illərdə hazırlanmış əsgər yeməyindən istifadə etdiyi görünür.
Görüntülər açıq-aydın Rusiya ordusunun maddi - texniki təchizatının zəifliyindən xəbər verir. Hazırda xarici kəşfiyyat orqanları da məsələni diqqətdə saxlayır.
Tanınmış araşdırmaçı jurnalist Arif Əliyev bu haqda “sherg.az”a danışarkən bildirib ki, Rusiyanın Ukraynaya hücumunun ilk günlərindən belə görüntülərlə rastlaşırıq:
“Hətta bəzi rus zabitlərinin də mövcud durumdan narazılığını eşidirik.Rus əsgərlərinin komandirləri onların payını yeyib, onlara keyfiyyətsiz məhsul verirsə, bu o demək deyil ki, onlar Ukrayna torpaqalarında soyğunçuluqla məşğul ola bilərlər.
Heç kim özgə torpağına gəlib, əlavə ərazilər tutub üstəlik orda əlinə keçəni çapıb-talamaq kimi bir hüquqa sahib deyil. Deyən lazımdır ki, ay rus əsgəri, sənin orda nə ölümün var ?! Hələ belə əməllərində özlərinə haqq da qazandırıblar”.
A.Əliyevin fikrincə, bu sadəcə rus ordusunun maddi təchizatında olan problemlə bağlı deyil:
"Əsas məsələ bütün ordu strukturunun çürüklüyüdür. Eyni zamanda burda korrupsiyanın yüksək olması fakı var. Rusiyanın hərbi sahəsində ciddi problemləri var. İkinci Qarabağ savaşında ermənilər tərəfindən müxtəlif ərazilərimizə atılan partlamayan rus sursatları rəsmi Moskvanın çökmüş hərb sisteminin ən bariz göstəricisi idi”.