KTMT-nin Ermənistana biganə münasibəti İrəvanı çox məyus edib. Bunu Ermənistanın xarici işlər naziri Ararat Mirzoyan Finlandiyanın “Lannen Media” nəşrinə müsahibəsində bildirib.
Nazir qeyd edib ki, öhdəlikləri olan müttəfiqlər bir-birinə kömək etməlidirlər, hərbi ittifaqın mənası budur. Bu laqeyd münasibət böyük məyusluğa səbəb oldu. Bu, həqiqətən də Ermənistanda ictimai rəyi dəyişdi. Bu, özünəməxsus vəziyyət yaratdı.
Politoloq Natiq Miri “Sherg.az”a vurğulayıb ki, bu Ermənistanın bəhanə üçün formalaşdırdığı nağıldır:
“Belə məsələləri Ermənistan Baş naziri, Xarici İşlər Nazirliyi və Nikol Paşinyanın rəhbərlik etdiyi partiyadan seçilən deputatlar da dilə gətirirlər. Ancaq bunların heç biri həqiqəti əks etdirmir. Çünki 44 günlük Vətən müharibəsi Azərbaycanın ərazisində gedirdi və beynəlxalq hüquqa görə Qarabağ Azərbaycanın tərkib hissəsi kimi tanınıb. Belə olan təqdirdə Kollektiv Təhlükəsizlik Müqaviləsi Təşkilatı (KTMT) və onun nüvəsi olan Rusiya hansı əsasla Vətən müharibəsində Azərbaycan ərazisinə müdaxilə edib Ermənistan tərəfindən vuruşmalı idi? Beynəlxalq hüquq buna imkan vermirdi və KTMT-nin digər üzvləri buna getməzdi. Rusiya prezidenti Vladimir Putin dəfələrlə söyləyib ki, Qarabağ Azərbaycanın beynəlxalq hüquqa söykənən ərazisidir. Ona görə də beynəlxalq hüquq Qarabağ üçün Azərbaycana qarşı vuruşmaq haqqını Rusiyaya vermirdi. Eyni zamanda Rusiya 10 noyabrda prosesə müdaxilə göstərib vasitəçilik etməklə müharibəni dayandıran yeganə dövlətdir. Bir vasitəçi dövlət savaşa necə müdaxilə edəcəkdi?”.
Ekspert qeyd edib ki, Ermənistan rəhbərliyi 44 günlük müharibə ərəfəsində Rusiyadan ağır hərbi yük təyyarələrinin rəsmi İrəvana silah daşıdığını unudurlar:
“Onların konkret tarixçələri, statistikası mövcuddur və heç kəs inkar edə bilməz. Yardımın məgər buynuzu olur? Ermənistana Rusiya tərəfindən bir milyardlıq silah verilmişdi və rəsmi İrəvan bunun müqavilində rəsmi Moskvaya 1 qəpik belə vermədi. Ermənistan rəhbərliyinin digər iddiası isə guya Azərbaycanın onların ərazilərini işğal etməsidir. Bu cür açıqlamaların da heç bir hüquqi əsası yoxdur və hazırda iki ölkə arasında sülh məsələsinin tərkib hissəsi sayılan sərhədlərin müəyyənləşməsi əsas mövzulardan biridir. Yəni hazırda sərhəd anlayışı mövcud deyil. Sərhəd anlayışın olmadığı bir məkanda Ermənistan hansı əsasla iddia irəli sürür ki, Azərbaycan qoşunlarının durduğu ərazi onlara məxsusdur? Ermənistanın iddiaları boş fərziyələrdən və ittihamlardan baş bir şey deyil. Qərbi sifarişlərini yerinə yetirməyə çalışan Ermənistan rəhbərliyi belə bəhanələr irəli sürməklə Rusiya orbitindən tamamilə çıxdıqlarını göstərməyə çalışlar”.
