Azərbaycan sərhəd-keçid məntəqəsi quraşdırmaqla gerçək tarixin necə yazıldığını göz önünə sərdi
"Saxta "soyqırımın" anıldığı 24 apreldən bir gün öncə Azərbaycan dövləti Laçın yolunun başlanğıcında sərhəd-keçid məntəqəsi quraşdırmaqla gerçək tarixin necə yazıldığını və nə olduğunu bütün çılpaqlığı ilə göz önünə sərdi". Bunu millət vəkili Sahib Alıyev deyib. Deputat bildirib ki, bununla da saxta "soyqırımı" milli özünütəqdim və özünütəsdiq fürsəti olaraq dəyərləndirənlərə bir daha ayrı-ayrı güclərin əlində geosiyasi alət olmağın perspektivsizliyi başa salındı:
"Bəzi ölkələrdə bu olay Ermənistanın fakt qarşısında qoyulması kimi qiymətləndirilir. Xeyr, bu, Ermənistandan çox, oradakı xəstə təfəkkürlü şəxsləri revanşizmə həvəsləndirən yırtıcı dövlətləri, Azərbaycanın ikinci Qarabağ savaşındakı zəfərini həzm etməyənləri fakt qarşısında qoymaq idi.
Söhbət Fransadan, İrandan və digərlərindən gedir. ABŞ-dəki bəlli çevrələrin və Fransanın Laçın yolunda sərhəd-keçid məntəqəsinin qurulmasını pisləyən açıqlamalarını ikili standart yox, məhz ikiüzlülük, gözdən pərdə asmaq kimi qiymətləndirirəm.
Bəyəm onlar üçtərəfli bəyanatın 9-cu bəndini yerinə yetirtməməklə 6-cı bəndin də üstündən xətt çəkdiklərini bilmirdilər? Azərbaycan Prezidentinin hələ 2021-ci ilin dekabrında Brüsseldə Laçın yoluyla Zəngəzur dəhlizinin eyni statusluluğu haqda dediklərini unutmuşdular? Əlbəttə, yox. Beləliklə, cənab İlham Əliyev həm sözügedən dövlətlərə, həm də digərlərinə növbəti dəfə göstərdi ki, biz bütün ssenarilərə hazırıq".
Parlament üzvü diqqətə çatdırıb ki, Böyük Britaniyanın müstəqil tədqiqat qurumlarının hesabatlarında göstərilir ki, Ermənistan ötən il ABŞ-dən, Avropa Birliyindən çip və prosessor alaraq həmin məhsulların 97 faizini Rusiyaya ötürüb:
"Maraqlıdır, başqa dövlətlər Rusiyaya qarşı sanksiyanı azacıq pozarkən üstlərinə yerindiyi halda niyə Ermənistanın bu hərəkətlərinə göz yumulur?! Ermənistanın Rusiyanın proksisi funksiyasını yerinə yetirdiklərini bildikləri halda niyə səslərini çıxarmırlar? Əlbəttə, onları 30 ildə yaxşı tanıdığımızdan suallar ritorikdir".
