Milli Məclisdə TÜRKPA-nın komissiya iclası keçirilib
Türk Dövlətləri Parlament Assambleyasının (TÜRKPA) Ətraf mühit, təbii ehtiyatlar və sağlamlığın qorunması komissiyasının iclası keçirilib. İclasda Azərbaycan, Türkiyə, Qazaxıstan, Qırğızıstan və TÜRKPA katibliyinin nümayəndələri iştirak ediblər. Toplantıda fevralın 6-da Türkiyədə baş verən dağıdıcı zəlzələdə həlak olanların xatirəsi 1 dəqiqəlik sükutla yad edilib.
"Türkiyədə baş verən faciə bizi dərindən sarsıdıb"
Milli Məclis sədrinin birinci müavini Əli Hüseynli deyib ki, qardaş Türkiyədə baş vermiş faciə bizi dərindən sarsıdıb. Vitse-spiker vurğulayıb ki, yaxın vaxtda qardaş ölkə bu problemdən qurtulacaq: "TÜRKPA-nın bu gün keçirilən iclası bizim üçün vacibdir. 85 gündür Azərbaycan ekofəallərı Laçın yolunda ekoloji terrora qarşı mübarizə aparır. Ümid edirik ki, TÜRKPA-nın bu gün baş tutan iclasında bu məsələ də geniş müzakirə olunacaq və TÜRKPA Azərbaycanın haqq, ədalət işinə dəstək verəcək".
Azərbaycan Milli Elmlər Akademiyasının (AMEA) vitse-prezidenti, akademik İradə Hüseynova deyib ki, ermənilər ərazilərimizdə biomüxtəlifliyə ciddi ziyan vurub: "30 illik işğal dövründə ərazilərimiz ermənilər tərəfindən ekoloji genosidə məruz qalıb və bu da biomüxtəlifliyə ciddi ziyan vurub. Azərbaycan həmin ərazilərdə hazırda biomüxtəlifliyin qorunması üçün ciddi tədbirlər həyata keçirir. Bu gün biomüxtəliflik Azərbaycan üçün aktual məsələlərdən biridir”.
"Ekoloji terror mütləq qınanılmalıdır"
Millət vəkili Əhliman Əmiraslanov bildirib ki, Azərbaycanın tarixi torpaqları uzun müddət ərzində işğal altında qalıb: “Bu illər ərzində Ermənistan tərəfi həmin ərazilərdə ekoloji terror törədib. Azərbaycan tarixi torpaqlarını işğaldan azad etdikdən sonra da ermənilər ekoloji terrora əl atıb. Bu gün TÜRKPA-nın iclasında ümid edirik ki, üzv dövlətlər Ermənistanın bu qeyri-konstruktiv davranışına münasibət bildirəcək. Digər dövlətin ərazisində ekoloji terrorun törədilməsi mütləq qınanılmalıdır”.
