Xarici işlər naziri Ceyhun Bayramov jurnalistlərə açıqlamasında deyib ki, Zəngəzur dəhlizinin açılması ilə bağlı Azərbaycan öz ərazisində işləri sürətlə davam etdirir, Araz körpüsünün tikintisi davam edir. Nazir bildirib ki, Ermənistanın öz öhdəliklərini yerinə yetirməsi ilə bağlı son müsbət qərar yoxdur.
Siyasi şərhçi Azər Həsrət “Sherg.az”a vurğulayıb ki, Azərbaycan bu məsələləri həll etmək problemli deyil:
“Əvvəldən də həmin məsələlərlə bağlı heç bir çətinliyimiz yox idi. Dövlətimiz kifayət qədər səfərbər olunur, çox qısa müddətdə bötük layihələri icra edirik. Həmçinin Qarabağın, Şərqi Zəngəzurun dirçəldilməsi üçün böyük işlər görülür. Zəngəzur dəhlizinə Azərbaycan tərəfindən keçən hissəsi isə bizim üçün həll çətin olmayan məsələlərdən biridir. Faktiki olaraq Azərbaycan həmin yolu tikintisini qurtarıb. Geriyə isə Ermənistan tərəfində olan hissə qalıb. Ermənistan isə özünün sıxıntılı halında həmin yolu Azərbaycan kimi sürətlə tikə bilməyəcək. Amma əsas məsələ Zəngəzur dəhlizi ilə bağlı qərarın verilməsidir. Ermənistan bu qərarı verərsə, hətta Azərbaycan kredit şərtləriylə yolun qalan hissəsini özü də tikə bilər. Yaxud da Zəngəzur dəhlizinə aid ərazi Azərbaycana icarə verilir və rəsmi Bakı öz maliyyəsi hesabı yolu tikir. Daha sonra Azərbaycan Ermənistanın hansısa müdaxiləsi olmadan həmin yoldan istifadə edir. Ona görə də Ermənistan vaxtı itirməməli və Azərbaycan üçün yaşıl işıq yandırılmalıdır ki, tezliklə işə başlasın. Əgər qərar verilsə, Azərbaycan təxminən 6 ay içində Zəngəzur dəhlizini işlək vəziyyətə gətirəcək. Bundan təkcə Azərbaycan-Ermənistan deyil, eyni zamanda Türkiyə, İran, Rusiya, Avropa və Şərq ölkələri istifadə edə biləcəklər. Buna görə də Ermənistan "oyunpozanlıq" etməməlidir. Onsuz da Zəngəzur dəhlizi ilə bağlı Azərbaycanın alternativ variantları var”.
