Rusiya prezidenti Vladimir Putinlə fransalı həmkarı Emmanuel Makron arasında telefon danışığı olub. Tərəflər Ukraynanın cənub- şərqində gərginliyin artmasından narahatlıqlarını ifadə ediblər. E.Makron və V.Putin həmçinin Qarabağ probleminin həlli üçün ATƏT-in Minsk qrupunu şərçivəsində tezliklə “konkret təşəbbüs” irəli sürəcəklərini bildiriblər.
Məlumdur ki, Qarabağ münaqişəsi başa çatsa da, Rusiya və Fransa həmsədrlik institutunun bərpası üçün can atır. Halbuki Azərbaycan Prezident dəfələrlə münaqişənin başa çatdığını, tarixə qovuşduğunu, ATƏT-in Minsk qrupunun isə “kitabının bağlandığını” vurğulayıb. Bəs, belə olduğu halda həmsədr ölkələrin ATƏT-i gündəmə gətirməkdə məqsədləri nədir?
Sualımızı cavablandıran siyasi analitik Turab Rzayev “Sherg.az”a bildirib ki, Fransa və Rusiyanın üst-üstə düşən və düşməyən maraqları var. Onun sözlərinə görə, üst-üstə düşən maraqlar daha çox vadar edir ki, tərəflər ortaq açıqlama versinlər:
“Rusiya sülhməramlılarını bölgəyə yerləşdirib və üçtərəfli bəyanat imzalanıb. Amma rusiyalı sülhməramlıların hələ də mandatı yoxdur. Hələ də rəsmi olaraq sülhməramlı qüvvə sayılmırlar. Azərbaycan və erməni tərəfinin ciddi etirazı olsa, rus ordusunun bölgədən çıxarılmasını istəyə bilərik. Buna görə də Rusiya çalışır ki, sülhməramlılarının yerləşdirilməsini rəsmiləşdirsin. Bunun üçün də Minsk qrupuna ehtiyacı var. Rəsmiləşdirə bilməsə belə münaqişəyə nəzarət etmək adı ilə Minsk qrupunun işə düşməsini istəyirlər. Məqsəd odur ki, gələcəkdə sülhməramlılarla bağlı hansısa məsələ ortaya çıxanda Minsk qrupu adından təzyiq göstərə bilsinlər. Guya ATƏT aktiv fəaliyyət göstərir və münaqişəni nizamlayır. Bir sözlə, Rusiya ATƏT vasitəsilə təzyiq elementini əlində saxlamaq istəyir. Eyni hal Fransaya da aiddir. Fransa tamamilə bölgədən qovulub. ATƏT-i aktivləşdirməklə “münaqişənin nəzarətində mən də varam, biz də burdayıq” demək istəyir”.
T.Rzayev söyləyib ki, son dövrlər Fransada bəzi ağızlarda Qarabağın “müstəqilliyi”nin tanınması ilə bağlı səslər eşidilir:
“Əlbəttə ki, bu, bizim üçün xoşagəlməz haldır. Fransa və Rusiyadakı bəzi qüvvələr Minsk qrupunun hansısa mandatda qalmasını təzyiq elementi kimi Azərbaycan və Türkiyəyə qarşı istifadə edə bilmək üçün bu qurumu aktiv saxlamaq istəyirlər. Bu baxımdan onlar üçün əsas odur ki, münaqişə bitməyib. Daha doğrusu münaqişənin bitmədiyini göstərmək istəyirlər. Həmçinin dünyaya münaqişənin yekun nizamlanması üzərində mandatın ATƏT-də olduğunu bəyan etməyə çalışırlar. Guya, məhz Minsk qrupunun həmsdərləri kimi Fransa və Rusiya burada əsas söz sahibləridir. Rusiya bir tərəfdən öz sülhməramlıları ilə fəaliyyət göstərir, digər tərəfdən ATƏT-in mandatının olmasında maraqlıdır. Çünki gələcəkdə sülhməramlılarla bağlı problem yaşayarsa, yekun söz hüququ olan iki ölkədən biri və ATƏT-in həmsədri kimi çıxış etmək istəyir”.
