Azərbaycan Ermənistanla sülh sazişinin imzalanmasını ATƏT-in Minsk qrupunun ləğvi və Ermənistan konstitusiyasına dəyişikliklərlə əlaqələndirir. İrəvan Bakı ilə sülh sazişinin bağlanması ilə eyni vaxtda MQ-ni ləğv etməyə hazırdır.
Bakupost.az TASS-a istinadən xəbər verir ki, bu barədə Ermənistanın baş naziri Nikol Paşinyan İrəvanda işə başlayan ikinci "Yerevan Dialogue" forumunda çıxışı zamanı bildirib.
Ermənistanın baş naziri xatırladıb ki, İrəvan və Bakı sülh sazişi layihəsini razılaşdırıblar və onun erkən imzalanması üçün bütün əsaslar var.
"Biz Azərbaycanla sülhün və dövlətlərarası münasibətlərin qurulmasına dair sazişin mətnini yekunlaşdırdıq. Mətn ümumiləşdirilib və mən şəxsən bu sənədi imzalamağa hazır olduğumu bəyan etdim. Bilirsiniz ki, Azərbaycan bu sənədin imzalanmasını rəsmi olaraq iki məsələ ilə əlaqələndirir. Onlardan birincisi ATƏT-in Minsk qrupu institutlarının ləğvidir", - deyə Paşinyan bildirib.
O, ATƏT-in Minsk qrupunun Ermənistan və Azərbaycan arasında danışıqlar yolu ilə münaqişənin həlli üçün platforma kimi yaradıldığını xatırladıb.
O vurğulayıb ki, Ermənistan tərəfi əmin olmaq istəyir ki, İrəvan və Bakı eyni xətt üzrə düşünür.
Ermənistan hökumətinin başçısı əlavə edib ki, Azərbaycanın ikinci şərti Ermənistan konstitusiyasını dəyişdirməkdir. Paşinyan bir daha əlavə edib ki, Ermənistan Konstitusiya Məhkəməsi artıq qeyd edib ki, ölkənin əsas qanununda başqa dövlətlərə qarşı ərazi iddiaları yoxdur və buna görə də bütün narahatlıqlar əsassızdır.
