Milli Məclisin yeni tərkibinin müəyyənləşməsi Mərkəzi Seçki Komissiyasının da yenidən formalaşdırılmasını diktə edir. Qanunvericiliyə görə, 18 nəfərlik MSK-da yerlərin üçdə bir hissəsini parlamentdəki çoxluq partiyasının, üçdə bir hissəsini bitərəflərin, üçdə bir hissəsini azlıqda qalan partiyaların təqdim etdiyi nümayəndələr tutur.
1 noyabr parlament seçkisinin ilkin nəticələrinə görə, Milli Məclisdə çoxluğu 71 nəfərlə YAP qazanıb. 11 partiya 12 nəfərlə azlıqda qalıb. Parlamentə seçilənlərin 42-si isə partiyasızdır. Milli Məclisə düşən azlıq partiyalarından Vətəndaş Həmrəyliyi Partiyası 2 mandat alıb. Digər partiyalara isə hərəyə 1 mandat əldə ediblər. Bu o deməkdir ki, MSK-nın 6 üzvünü 11 partiya müəyyənləşdirəcək. 2010-cu ildə formalaşmış Milli Məclisdən fərqli olaraq bu dəfə Ümid və Ədalət partiyaları parlamentə düşə bilməyib. Əvəzində 1 noyabr seçkisində parlamentə üç yeni azlıq partiyası gəlib: Sosial Demokrat Partiyası, Vəhdət Partiyası, Demokratik Maarifçilik Partiyası. Mərkəzi Seçki Komissiyasının yeni tərkibinin formalaşmasından danışan MSK katibi Mikayıl Rəhimov "Şərq”ə açıqlamasında deyib ki, parlament təsdiq olunandan sonra bu məsələyə baxılacaq: "Hələlik bununla bağlı hansısa müzakirə aparılmır. Parlamentin tərkibi rəsmən təsdiq olunandan sonra iclasların birində məsələ müzakirə ediləcək. Bilirsiz ki, Konstitusiyaya görə, MSK-nın tərkibini parlament formalaşdırır. Ancaq hələ buna zaman var. İndidən nəsə demək düzgün olmaz. Milli Məclis işinə başlayandan sonra MSK-ya üzvlər müəyyən olunacaq”. M.Rəhimov seçkinin nəticələrindən narazı qalan namizədlərin şikayət ərizələrinə baxıldığını deyib: "MSK-ya indiyə kimi bir neçə müraciət daxil olub. Növbəlilik prinsipi ilə şikayətlərin hamısına qurumun iclaslarında baxılacaq və müvafiq qərarlar veriləcək”.
İsmayıl
