Vaşinqton və Moskva arasında gərginlik artıb. Buna səbəb Ukraynanın şərqində Rusiyayönlü separatçıların beynəlxalq müşahidəçiləri girov götürməsi olub.
Aprelin 26-da ABŞ dövlət katibi Con Kerri Rusiyanın xarici işlər naziri Sergey Lavrovla telefonla danışıqlar aparıb, ancaq tərəflər razılığa gələ bilməyiblər. Amerikalı diplomat Moskvadan ATƏT-in hərbi müşahidəçilərinin azad olunması səylərinin dəstəkləməsini istəyib.
Lavrov isə öz növbəsində, Vaşinqtondan Kiyev hökumətinin həbs etdiyi Rusiyayönlü seperatçıların liderinin azad olunması üçün addımlar atmasını istəyib.
Bu arada aprelin 26-da Böyük 7-lik (G7 )ölkələri Ukraynadakı böhrana səbəb olan Rusiyaya qarşı yeni sanksiyaların qoyulmasına razılaşıblar.
ABŞ-ın yüksəkvəzifəli rəsmiləri bildiriblər ki, bu sanksiyalardan bəziləri artıq bu bazar ertəsi qüvvəyə minəcək.
Vaxtilə Rusiyanın daxil olduğu G8-dən G7-yə çevrilən qrup Kreml üzərinə təzyiqləri artırmaq məqsədilə Krımın ilhaqından bəri Moskvaya qarşı iqtisadi cəzalandırma vasitələrinə keçib.
Birgə bəyanatda deyilir ki, Ukraynada gələn ay keçiriləcək seçkilərin uğurunu və demokratikliyini təmin etmək naminə Rusiyanın üzərinə məqsədli sanksiyaların tətbiqi çevik şəkildə reallaşdırılmalıdır.
