"Aprel hadisələri Azərbaycan ordusunun bir neçə istiqamətdə ermənilərə tutarlı cavabıdır”.
Bunu Sherg.az-a ötən ilin 2-4 aprel tarixlərində baş verən aprel döyüşünün il dönümü ilə bağlı danışarkən millət vəkili Rövşən Rzayev deyib.
Onun sözlərinə görə, aprel döyüşləri sübut etdi ki, Azərbaycan Silahlı Qüvvələri bu müddət ərzində Ali Baş Komandanın rəhbərliyi ilə yüksək səviyyəyə gəlib çıxıb:
"Öncə Allah şəhidlərimizə rəhmət etsin. Birincisi, aprel döyüşləri zamanı ermənilərin ordu qüvvəsi darmadağın oldu. İkinci istiqamət isə ondan ibarətdir ki, azərbaycanlılar torpaqları unudacaq. Cocuq Mərcanlı kəndi və onunla bağlı verilən sərəncam, kənd sakinlərinin ora köçmək istəməsi bu fikirləri darmadağın etdi. İlk sərəncamda 50 bina tikilməsi nəzərdə tutulmuşdu. Sonradan bütün kənd sakinləri ərizə ilə müraciət etdi ki, hamı yerləşmək istəyir. Yaxın gələcəkdə daha geniş evlər tikiləcək.
Üçüncü, ən vacib məqam ondan ibarət idi ki, Azərbaycan gəncləri dünya ictimaiyyətinə öz səslərini çatdırdılar. Bu da, o deməkdir ki, nə qədər müddət keçsə də, Azərbaycan öz mövqelərində iddialıdır. Ölkə başçısı tərəfindən bu mövqe bütün beynəlxalq qurumlarda, təşkilatlarda səsləndirilib.
Aprelin 2-də hadisə baş verəndən 1 gün sonra cənab prezident birtərəfli olaraq atəşkəsin saxlanmasını bəyan etdi. Bununla göstərdi ki, biz sülh tərəfdarıyıq, danışıqlar prosesi ilə münaqişəni həll etmək istəyirik. Amma ehtiyac olduqda öz ərazimizdə anti-terror əməliyyatı keçirməkdə tam imkan sahibiyik. Biz eləsək də təbii ki, bu yolla ərazi bütövlüyümüzü təmin edə biləcəyik.
Ermənistan konstruktiv mövqe sərgiləməsə, Azərbaycan öz imkanlarından beynəlxalq hüquq çərçivəsində istifadə edəcək. Bu zaman aprel döyüşündən daha böyük hərbi əməliyyatlar baş verə bilər”.
Ayyət Əhməd
