Ötən gün Xocalı soyqırımının 27-ci il dönümü ilə bağlı Bakıda möhtəşəm yürüş keçirilib. Yürüşə qatılan Prezident İlham Əliyev arxasına aldığı böyük xalq izdihamı ilə şəhərin küçələrində hərəkət edirək Xocalı abidəsini ziyarət edib. Əslində dövlət başçısının xalqla birlik sərgiləməsi dəfələrlə nümayiş olunub. Ələlxüsus da Qarabağ məsələsi ilə bağlı anım günlərində millət öz liderinin ətrafında sıx birləşərək həm dünyaya, həm də ölkədəki qərəzli qüvvələrə, radikal müxalifətə ən gözəl mesajı veriblər.
Məhz Xocalı yürüşündəki izdiham da güclü xalq-iqtidar birliyinin təzahürü idi. Bunun əksinə olaraq yürüşdə iştirak edən "Milli Şura” rəhbərliyini, konkret AXCP sədri Əli Kərimlini sadəcə 5-10 nəfər müşayiət edirdi.
Onların da üç-dörd nəfəri partiya sədrinin cangüdənləri idi. Təsəvvür edin, hər çıxışında onu on minlərin dəstəklədiyini iddia edən Ə.Kərimli ətrafına vur-tut 10 adam yığa bilmişdi.
Halbuki, radikal müxalifət hər zaman arxasında "böyük gücün”, "sosial bazanın” olduğunu iddia edirdi. Lakin anım günü gördüyümüz mənzərə bütün reallığı ortaya qoydu və "Milli Şura” rəhbərliyinin yalanlarını ifşa etdi. Ehtimallara görə, radikal müxalifət xarici dairələrdən qrant ala bilmədiyi üçün öz əlaltılarına pul paylaya bilməyib. Ona görə də "dəstəkçiləri” onu tək buraxıblar.
Məsələni "Sherg.az”a dəyərləndirən siyasi şərhçi, tanınmış jurnalist Azər Həsrət deyib ki, əslində, Əli Kərimlinin arxasında heç vaxt minlərlə insan olmur:
"O və tərəfdarları həmişə bu cür günlərdə fırıldaq işlədirlər. Belə tədbirlərin kütləvi olacağını bildikləri üçün gəlib böyük izdihamın qarşısında şəkil çəkdirirlər. Sonra da həmin şəklin arxasında gizlənib təbliğat qururlar ki, onminlərlə insanla birlikdə ziyarətə getdilər.
Lakin bu dəfə onların həmin əməlinin gerçəkləşməsinə imkan verilmədi və gerçəklər üzə çıxdı. Yəni Əli Kərimlinin real tərəfdarları onunla birgə oldu, görüntü də bəllidir. Prezident İlham Əliyevin arxasınca gedənlərə gəlincə, Azərbaycan xalqı çoxdan öz seçimini edib. Əgər əlavə təşkilatçılıq olsaydı, dövlət başçısının arxasınca milyonlar meydana çıxardı”.
İsmayıl
