"Kimin nə deməsindən asılı olmayaraq, konvensiyanın imzalanması böyük hadisədir”.
Bunu "sherg.az”a açıqlamasında siyasi elmlər namizədi, tanınmış politoloq Zaur Məmmədov deyib.
Xəzərin hüquqi statusu ilə bağlı anlaşmaya münasibət bildirən analitik xatırladıb ki, Konvensiyada əksini tapan bəzi məsələlər bundan öncəki sammitlərdə həllini taparaq, deklarasiya formasında müəyyən olunub:
"Lakin, deklarasiyadan fərqli olaraq Konvensiya hüquqi əhəmiyyətə malikdir və onun icrası mütləqdir. Beləliklə, Konsensiyanın imzalanmasını Bakının maraqlarının təmin olunması kimi də qələmə vermək olar. Sənədin imzalanmasında mühüm rol oynayan məsələ Bakı-Moskva və Tehranın razılığa gəlmələri oldu. Azərbaycanın bütün istəkləri Konvensiyada əksini tapdı”.Politoloqa görə, Azərbaycan bu sazişdən siyasi və iqtisadi dividentlər əldə edəcək:
"Ümumiyyətlə, Konvensiyanın imzalanmasından ən çox udan məhz Bakı, daha sonra isə Astana olacaq. O ki qaldı, Xəzərin dibindən keçə biləcək kəmərlər məsələsinə, konkret olaraq Transxəzər layihəsinə, bu , təbii ki, Türkmənistanın və Azərbaycanın maraqlarına cavab verən hadisə ola bilər. İndi söz Qərb konsorsiumları və Aşqabaddadır. Onlar layihəni maliyələşdirəcəklərmi?
Digər məsələ Konvensiyada əksini tapan ekoloji muddəalarla bağlıdır. Rusiya və İran Aşqabada yaşıl işıq yandıracaqlarmı? Əlbəttə ki, siyasətdə mümkün olmayan nəsə yoxdur. Moskva aktual maraqlarının nəzərə alınması fonunda hansısa məsələlərdə kompromisə gedə bilər”.
Qeyd edək ki, Xəzər dənizinin hüquqi statusunun müəyyənləşdirilməsi ilə bağlı 1996-cı ildən aparılan danışıqlar öz məntiqi nəticəsini verib. Avqustun 12-də Qazaxıstanın Aktau şəhərində Xəzəryanı dövlətlərin prezidentlərinin iştirakı ilə tarixi əhəmiyyətli sənəd imzalanıb. V Xəzər sammitinin yekununda Xəzərin hüquqi statusunu müəyyən edən sənədi təsdiq ediblər.
İsmayıl
