"Aprel döyüşləri göstərdi ki, başqaları bizə mane olmasa, çoxdan torpaqlarımızı işğaldan azad edərik”.
Bunu Sherg.az-a aprel hadisələrinin ildönümü ilə bağlı danışarkən Milli Məclisin İntizam Komissiyasının sədri, millət vəkili Ağacan Abiyev deyib.
A.Abiyev aprel döyüşlərinin Azərbaycanın şanlı səhifələrindən biri olduğunu diqqətə çatdırıb:
"Ötən ilin aprelində baş verən döyüşlər sübut etdi ki, lazım gələcək Azərbaycan öz torpaqlarını azad edəcək. Ordumuz buna qadirdir. Azərbaycan silahlı qüvvələri üçün də, xalq üçün də, bu döyüşlər çox gözəl nümunə oldu. Dünya gördü ki, Azərbaycan ərazi bütövlüyünü bərpa edə bilər. Beynəlxalq təşkilatlar boyunlarına götürdükləri vəzifələrini yerinə yetirmirlər. Azərbaycan o qədər qüdrətli dövlətdir ki, öz problemini özü həll edə bilər. Amma biz yenə də beynəlxalq təşkilatların üzvü kimi istəyirik ki, münaqişənin həllində də hər şey qanunla müəyyən olunsun. Amma ötən il 2-4 aprel hadisələri göstərdi ki, biz ərazilərimizi beynəlxalq qanun çərçivəsində azad edə bilərik”.
Aysel Aslan
