"Prezident İlham Əliyevin apardığı uğurlu siyasət və güclü ordu quruculuğu artıq öz bəhrəsini verir". Bu barədə sherg. az-a Şuşa Rayon İcra Hakimiyyətinin başçısı, Dağlıq Qarabağ Bölgəsinin Azərbaycanlı İcması İctimai Birliyinin sədri Bayram Səfərov bildirib. Birlik sədrinin fikrincə, Ermənistan artıq Azərbaycanın gücünü gördü: " Bütün Azərbaycan xalqı yüksək əhval ruhiyyədədir".
Təşkilat sədri İ.Əliyevin atəşkəsin birtərəfli dayandırılmasına dair sərəncamını da yüksək qiymətləndirib: " Bu da xalqımızın, prezidentimizin humanistliyindən irəli gəlir. Dünya ictimaiyyətinə bir mesaj verdik ki, Azərbaycan sülh tərəfdarıdır. Azərbaycanın heç kimin toprağında gözü yoxdur. Azərbaycan öz ərazilərini separatçılardan təmizləyir. Ermənistan ordusu torpaqlarımızı işğal edib. Biz də işğalçıları ərazilərimizdən çıxarırıq. Ordumuz lazım olan yüksəklikləri ələ keçirib, düşməni susdurur. Bu qələbə münasibətilə Azərbaycan xalqını təbrik edirəm. Möhtərəm prezidentimizi Allah qorusun".
B. Səfərov onu da qeyd edib ki, xalqımız ordumuzun gücünə arxalanır: "Bütün sərhədyanı rayon və kəndlərdə əhali böyük ruh yüksəkliyi içərisindədir. Şəxsən mənə çoxsaylı müraciətlər olur. İnsanlarımız cəbhəyə gedib, döyüşlərə qatılmaq istəyirlər. Biz isə bildiririk ki, Azərbaycanın güclü ordusu var. Cənab prezident bu məsələləri orduya həvalə edib. İnsanlarımızın əhval ruhiyyəsi çox yüksəkdir".
Ayyət Əhməd
