"Prezident İlham Əliyevin son vaxtlarda verdiyi sərəncamları çox yüksək qiymətləndirirəm”.
Bunu "Sherg.az”a açıqlamasında Milli Məclisin Aqrar siyasət komitəsinin sədri Eldar İbrahimov deyib.
Millət vəkili vurğulayıb ki, istər şəhid ailələri və müharibə veteranları ilə bağlı verilən qərarlar, istərsə də sosial müavinətlərin, maaş və təqaüdlərin artırılması olduqca təqdirəlayiq addımlardır:
"Dövlət başçısı ötən gün keçirilən müşavirədə bu cür islahatların davamlı olacağı anonsunu verdi. Bütün bunların hamısı Azərbaycan xalqının rifah halının yaxşılaşmasına hesablanıb. Həyata keçirilən siyasətin mərkəzində Azərbaycan vətəndaşı faktoru dayanır.
Nə addım atılırsa, ilk növbədə insanlarımız nəzərdə tutulur, əhalinin sosial vəziyyəti ön plana çəkilir. Fikir verin, ölkədə elə bir sahə, elə bir təbəqə qalmayıb ki, Prezident onlarla bağlı Sərəncam verməsin və artım olmasın.
Dövlət başçısının qərarları yüz minlərlə insanımızı əhatə edir. Ona görə də bu istiqamətdə görülən işlərin hamısını yüksək qiymətləndirirəm. Əsas məsələ odur ki, tədbirlər kampaniya xarakterli deyil, davamlı olacaq. Nəticədə insanlarımızın daha yaxşı yaşaması üçün şərait yaradılacaq”.
Parlament üzvü dövlət başçısının çoxmənzilli binaların sənədləşməsi ilə bağlı verdiyi Sərəncamı da şərh edib:
"Vətəndaşları narahat edən problemlərdən biri də vaxtilə tikilmiş və hansısa səbəblərə görə rəsmi olaraq qəbul edilməmiş çoxmənzilli binaların sənədləşməsi məsələsi idi. Prezident İlham Əliyev bu problemin həlli üçün də göstəriş verdi və Sərəncam imzaladı. Dörd yüz çoxmənzilli binada təxminən 60 minə yaxın əhali yaşayır ki, bu da hardasa 300-400 min arası insan deməkdir. Yəni çox ciddi rəqəmdir. Bu qərarın özü Prezidentin ölkə vətəndaşlarına böyük diqqətinin və qayğısının mühüm təzahürüdür”.
İsmayıl
