"ATƏT-in Minsk Qrupunun sabiq amerikalı həmsədri Ceyms Uorlik Kremlin göstərişi ilə danışır”.
Bunu "Şərq”ə açıqlamasında politoloq Məhəmməd Əsədullazadə deyib. Ekspert bildirib ki, sabiq amerikalı həmsədri Ceyms Uorlik müsahibəsində Qarabağ münaqişəsinin həlli ilə bağlı imkanların açıldığını qeyd edib: "Onun fikrincə, Rusiya problemin həllində maraqlıdır. Amma Uorlik ABŞ-ın və "Bolton” planının adını çəkmir. Sabiq həmsədr Rusiya və "Lavrov” planın üzərində dayanmaqla ABŞ-ı görməzdən gəlir. Halbuki, münaqişənin həllində Vaşinqton daha çox maraqlıdır. Kremlin Ceyms Uorlikin müsahibəsini təşkil etməkdə məqsədi "Lavrov planı”nı qəbul etdirməkdən ibarətdir.
Uorlik "Lavrov” planının masada olduğunu vurğulayır. Sabiq həmsədr hazırda Rusiyanın hüquq firmasında çalışır və ruslarla dostluq əlaqələrinə malikdir. Təbii ki, o, Rusiyanın mövqeyini və irəli sürülən şərtləri müdafiə edəcək. Yəni Uorlik müsahibəsində səmimi deyil. O, çox yaxşı bilir ki, Rusiya konfliktin həllində maraqlı deyil. Moskva yalnız öz maraqları kontekstində münaqişənin həllinə yanaşır. Məhz "Lavrov” planı buna əsaslanır”.
Analitik bildirib ki, Azərbaycan öz maraqlarına uyğun olmayan, xüsusi ilə BMT qətnamələrinə əsaslanmayan "Lavrov” və ya "Kazan” formulunu qəbul etməyəcək: "Hazırda Rusiya danışıqları öz moderatorluğuna qaytarmaq və "Lavrov planı”nı yenidən ortaya çıxarmaqla Ceyms Uorlikin müsahibəsin təşkil etdirib. Uorlik Kremlin mesajlarını çatdırır və imkanın açılmasını vurğulamaqla, bu imkanların Moskvada olduğunu önə çəkir. Yaxşı olardı ki, Uorlik öz ölkəsinin vasitəçiliyindən danışsın”.
İsmayıl
