Məlumdur ki, Türkiyədə 24 iyun seçkilərində Cümhuriyyət Xalq Partiyasının seçicilərinin bir hissəsi PKK-nın siyasi qanadı hesab olunan HDP-yə səs veriblər. Məhz bu sayədə kürdlərin partiyası 10 faizlik seçki baryerini keçməyi bacarıb.
Sədr Kamal Kılıçdaroğlu da bunu etiraf edib və müəyyən məsələlərə nail olmaq üçün düşmən mövqe nümayiş etdirən bir siyasi təşkilata dəstək verdiklərini açıq şəkildə dilə gətirib. Ana müxalifət partiyasının bu addımı Türkiyə ictimaiyyətində narazılıq yaradıb. Prezident Rəcəb Tayyib Ərdoğan terrorçuları müdafiə edən təşkilatın dəstəklənməsinə görə CHP-ni sərt ittiham edib. Bildirib ki, Kılıçdaroğlunun sayəsində separatçı qruplaşmanın müəyyən etdiyi şəxslər millət vəkili kimi parlamentdə yer alacaqlar:
"Ölkəsini, millətini, cümhuriyyətini, dövlətini sevən hər CHP-çi vətəndaşımızı bu partiyanın rəhbərliyindən hesabat tələb etməyə dəvət edirik”. Ekspertlərə görə, HDP-nin öz bazası hesabına istənilən seçkiyə qatılmasına qanunlar mane olmur.
Lakin PKK-ya açıq dəstək ifadə edən bir təşkilatın Məclisdə 67 deputatla təmsil olunması bir çox problemlərin üzə çıxmasına səbəb ola bilər.
Mövzunu "Şərq”ə dəyərləndirən politoloq Sədrəddin Soltan deyib ki, CHP özünü daha demokratik göstərməyə çalışır. Həm də Avropada öz nüfuzunu gücləndirmək niyyətindədir: "CHP hakim AK patiyaya qarşı genişmiqyaslı fəaliyyət göstərir.
İYİ partiyaya 15 deputatın verilməsi, onlarla birlikdə seçki ittifaqı yaradılması da buna nümunədir. CHP bununla həm də daha böyük görünməyə cəhd göstərir. Təbii ki, Kamal Kılıçdaroğlu və onun partiyasının aparıcıları HDP-nin, yaxud PKK-nın nə olduğunu yaxşı bilirlər. Bu baxımdan CHP-nin hədəflərindən biri müxalifəti bütövlükdə əhatə etməkdir. Lakin partiya seçkilərdə buna nail ola bilmədi. Nail olsaydı, prezidentliyə namizəd olaraq irəli sürdükləri Məhərrəm İncə qalib gələr, yaxud prezident seçkinsinin ikinci turu keçirilərdi. İYİ partiya ilə qurulan "Millət İttifaqı” artıq parlamentdə mövcud olmayacaq. Bundan sonra müxalifətdə olan bütün partiyalar təkbaşına fəaliyyət göstərəcək”.
İsmayıl
