"Prezident İlham Əliyevin həyata keçirdiyi siyasət sosialyönümlüdür. Bu siyasətin mərkəzində Azərbaycan vətəndaşı və onun sosial rifahı dayanır”.
Bunu "Sherg.az”a açıqlamasında millət vəkili, siyasi elmlər doktoru Elman Nəsirov deyib.
Deputat bildirib ki, dövlət başçısının 15 illik prezidentlik dövrünə nəzər salsaq, bir daha əmin olarıq ki, əhalinin sosial rifahı ilə bağlı məqsədyönlü, sistemli və ardıcıl şəkildə çox ciddi addımlar atılıb:
"2019-cu ildə bu istiqamətdə daha ciddi addımlar atıldığının şahidiyik. Sosial paket şəklində təqdim olunan bu addımlar ilk növbədə Prezidentin siyasi iradəsinin ifadəsidir. Eyni zamanda bunları həyata keçirmək üçün bizim maliyyə imkanlarımız var. Bu, çox önəmli məsələdir. Xüsusilə vergi və gömrük sistemində aparılan islahatlar Azərbaycan büdcəsinə təkcə yanvar ayı ərzində 105 milyon manat vəsaitin daxil olmasına gətirib çıxarıb. Bunlar çox mühüm göstəricilərdir. Eyni zamanda yanvar ayında ümumi daxili məhsulun 3 faiz artması, qeyri-neft sənayesində 14 faiz artım onu göstərir ki, Azərbaycan iqtisadiyyatında artım tempi kifayət qədər yüksəkdir”.
Parlament üzvünün sözlərinə görə, heç şübhəsiz belə islahatlar ölkənin maliyyə təminatı üçün mühüm şərtdir:
"Cənab Prezidentin xüsusi kateqoriyada olan insanlara diqqəti bütün cəmiyyət tərəfindən yüksək dəyərləndirilir. Şəhid ailələri, məcburi köçkün və qaçqınlar, müharibə veteranları, müharibə əlilləri ilə bağlı verilən qərarlar, o cümlədən valideynlərini itirmiş uşaqlara və çoxuşaqlı analara müavinətin artırılması, minimum əmək haqqının 130 manatdan 180 manata qaldırılması, pensiyaların 160 manata qədər yüksəlməsi, tələbələrin təqaüdünün artırılması və s. mühüm islahatlardır. İslahatlar ölkədə 2 milyon 200 min vətəndaşı əhatə edir ki, bu da çox böyük göstəricidir. Hər bir vətəndaş görülən tədbirləri öz sosial rifahında hiss edir.
Bugün dünyada və regionumuzda xaos hökm sürməkdədir. Bölgədə yeni təhdilər, münaqişə ocaqları yaranmaqdadır. Uzun illərdir xarici ölkələrdə maaşların və təqaüdlərin artırılması gündəmdə deyil. Bəzi regionlarda insanlar real təhlükə ilə üz-üzə qalıb. Hətta sabaha ümidləri belə qalmayıb. Ancaq bütün bunlara rəğmən Azərbaycan sabit və stabil ölkədir. Prezidentin öz xalqına olan diqqət və qayğısı hər addımda özünü biruzə verir. Dövlət başçısı ötən gün çıxışında bildirdi ki, bu, hələ son deyil və proses mütəmadi davam edəcək”.
E.Nəsirovun fikrincə, problemli kredit məsələsi xeyli vaxtdır cəmiyyətdə diskusiya probleminə çevrilmişdi:
"Cənab Prezident bu məsələnin həll olunacağı anonsunu da verdi. Dövlət başçısının birbaşa rəhbərliyi ilə keçirilən iqtisadi islahatlar cəmiyyətdə böyük ruh yüksəkliyi yaradır, ölkə vətəndaşlarını məmnun edir. Təəssüf ki, bəzi üzdən iraq, xalqdan ayrı düşmüş siyasi dairələr buna da bir siyasi rəng qatmaq istəyirlər. Bir çox hallarda dəyişikləri öz adlarına çıxmağa çalışırlar. Amma bunlar mənasız yanaşmalardır və xalq Prezidentini çox gözəl tanıyır və seçkilərdə də layiqli liderinə öz etimadını göstərir”.
İsmayıl
