Ermənistanın müdafiə naziri David Tonoyan bildirib ki, əgər Qarabağda hərbi əməliyyatlar bərpa olunarsa, erməni ordusu ləngiməyəcək. Nazir əlavə edib ki, Ermənistan bundan sonra silah alarkən kəmiyyətə deyil, keyfiyyətə üstünlük verəcək:
"Ermənistanın iqtisadi və demoqrafik imkanları Azərbaycanla müqayisə oluna bilməz. Məhz buna görə Ermənistan keyfiyyətə önəm verəcək”. Tonoyanun sözlərinə görə, Ermənistan hücum silahları almağa davam edir:
"Təcrübəyə əsasən, daima müdafiədə olan ordular son nəticədə məğlub olur. Biz müdafiə mövqeyində qalmağa hazırlaşmırıq”. "Ermənistan ordusu hücum edəcəkmi?” sualına cavab olaraq nazir cavab verib: "Niyə də yox!”.
Erməni nazirin sözlərini "Sherg.az”a dəyərləndirən ehtiyatda olan polkovnik Şair Ramaldanov deyib ki, müdafiə naziri prinsipcə başqa cür çıxış edə bilməz. Yəni müdafiə nazirliyinə rəhbərlik edən şəxs verilən suallara ancaq bu formada cavab verə bilər. Ekspertin fikrincə, nazirin açıqlamalarının reallığı əks etdirməsi ciddi sual altındadır:
"Atalar demişkən "halva halva deməklə ağız şirin olmaz”. Ermənistanın iqtisadiyyatı, ölkədəki sosial durum çox gərgindir. Sarkisyan hakimiyyətdən getsə də, hələlik onun rəhbərlik etdiyi klan tamamilə çökməyib. Paşinyan "Qarabağ klanı”nın öhdəsindən gələ bilmir. Ona görə ki, bütün maliyyə mənbələri Sarkisyanın quldur klanının əlində cəmləşib. O da bəllidir ki, erməni cəmiyyətində orduya münasibət heç də yaxşı deyil. Valideynlər övladlarının əsgərə göndərmək istəmirlər. Həmçinin, erməni ordusunda ciddi surətdə ərzaq və geyim problemi yaşanmaqdadır. Ermənistandan olan əsgərlərlə Qarabağdan gələn hərbi qulluqçular arasında ziddiyyətlər, qarşıdurmalar adi hala çevrilib. Erməni tərəfi özü də etiraf edir ki, qeyri-döyüş şəraitində tələf olan əsgərlərin sayı döyüş vaxtı ölənlərdən iki qat daha çoxdur”.
Hərbi ekspertin sözlərinə görə, Ermənistanın geosiyasi vəziyyəti də ürəkaçan deyil:
"Ermənistan eyni anda iki stulda əyləşmək istəyir. Çalışır ki, özünü Qərbə, konkret ABŞ və Avropaya "demokratik ölkə” kimi təqdim etsin və dividentlər qazansın. Ancaq buna nail ola bilmir. Eyni zamanda bugün Ermənistan KTMT daxilində də iflic vəziyyətə düşüb.
Paşinyan hökumətinin səyi nəticəsində rəhbəri müəyyən edilməyən təşkilat fəaliyyətsiz quruma çevrilib. Ermənistanın Rusiya başda olmaqla təşkilatın bütün üzvləri ilə ciddi problemləri mövcuddur. Bütün bunları nəzərə alsaq, Ermənistan ordusunun hansı gücə malik olması aydın olar. Müqayisə apardıqda nəticələrin Ermənistanın xeyrinə olmadığı ortaya çıxar. Əgər tərəflər arasında hərbi əməliyyatlar başlasa, düşmən ölkə ciddi zərbə alacaq və çox zəif duruma düşəcək”.
Polkovnik bildirib ki, Ermənistan kredit yolu Rusiyadan silah alır:
"Müdafiə naziri keyfiyyətli silah almaqdan danışır. Müasir silahların qiyməti çox bahadır. Ona görə də ancaq güclü iqtisadiyyatı olan ölkələr ən yeni hərbi texnikanı ala bilərlər. Regionda iqtisadi gücünə görə müasir silah almaq gücündə olan yeganə ölkə Azərbaycandır. Ən keyfiyyətli və vacib silahlar məhz bizim ölkədədir. Məsələ o yerə çatıb ki, artıq ermənilər Qarabağ məsələsindən və qarabağlılardan beziblər. Düşmən yaxşı bilir ki, Qarabağ hadisəsinə görə başlayan problemləri ancaq Qarabağla bitə bilər”.
İsmayıl
