"Fuad Abbasovun müdafiəsi ilə bağlı konkret hansı addımlar atılacağını deyə bilmərəm. Biz ən əsası həmkarımızın hansı ölkənin vətəndaşı olduğuna diqqət yetirməliyik”. Bu sözləri Sherg.az-a açıqlamasında media eksperti, tanınmış jurnalist, "Ayna"nın baş redaktoru Elçin Şıxlı deyib.
Fuad Abbasovun hansısa Türkiyə agentliyinin Rusiyadakı nümayəndəsi kimi tanıyan E.Şıxlı eyni zamanda Rusiyada Azərbaycanı da təmsil edən çoxsaylı jurnalistlərimizin olduğunu söyləyib:
" Əgər Fuad Abbasov Azərbaycan vətəndaşıdırsa, biz onun müdafiəsini daha geniş şəkildə qura bilərik. Yəni hökumətin müdaxiləsi ilə bu məsələ tezliklə həll oluna bilər. Yox əgər Fuad Abbasov bizim vətəndaşımız deyilsə, onda əsas yük dövlətdən daha çox ictimai təşkilatların üzərinə düşür. Dövlət açıq şəkildə hüquqi müdafiədə təmsil oluna bilməz”.
E. Şıxlının sözlərinə görə, onun haqqında cinayət işi açılıbsa, vəkillər qrupu olmalı və həmkarımızın müdafiəsi ilə məşğul olmalıdırlar:
"Həyatına təhdid məsələsini sənədləşdirib məhkəmə qarşısında iddia qaldırmalıdırlar. Paralel olaraq da, sosial şəbəkələrdə, mediada dəstək nümayiş etdirməliyik”.
Qeyd edək ki, Azərbaycanlılarla çeçenlər arasında qalmaqalda vasitəçilik edərək görüşlərin təşkil edilməsinə nail olan Fuad Abbasov dünən sosial şəbəkədə və Youtube-dan izləyicilərinə müraciət edərək ermənilərin onunla bağlı ermənilərin hərəkətə keçdiyini və hər an öldürülə biləcəyini açıqlayıb. Hətta bu videonun onun son paylaşımı ola biləcəyini istisna etməyən jurnalist ermənilərin imza kampaniyası apardığını və onun həbs olunmaq ehtimalı olduğunu əlavə edib.
Şəymən
