"İran Parlamentinin Urmiyadan olan deputatı, əslən Azərbaycan türkü Nadir Qazipur İran məktəblərində ikinci dil kimi rus dili əvəzinə Azərbaycan dilinin keçirilməsini təklif edib”.
Bunu "Şərq”ə açıqlamasında Sülh və Münaqişələrin Həlli Mərkəzinin rəhbəri Məhəmməd Əsədullazadə deyib. Politoloqun məlumatına görə, İran Təhsil Nazirliyi orta məktəblərdə ingilis dili əvəzinə, rus dilinin tədrisini həyata keçirəcək:
"İngilis dilinin tədrisinin ləğv edilməsi əsasən bu ölkəyə qarşı iqtisadi sanksiyalara cavab kimi qəbul edilib. Millət vəkili Nadir Qazipur İran parlamentində daima Azərbaycan türklərinin hüquqları uğrunda əzmkar mübarizə aparır. İran hakmiyyətini tribunadan "Mən Türkəm” sloqanları ilə təhdid edir.
Hesab edirəm ki, İran hakimiyyətinin 40 milyona yaxın Azərbaycan türklərinin dilini görməzlikdən gəlməsi, bu dilin məktəblərdə tədrisinə icazə verilməməsi insan hüquq və azadlıqlarının rejim tərəfindən kobud pozuntusudur. Hətta BMT-nin İnsan Haqqları Komissiyası səviyyəsində İran hakimiyyətinin azərbaycanlılara və bəlluclara qarşı ayrı-seçkilik siyasəti ötən həftə bir daha tənqid edildi”.
Ekspertin fikrincə, urmiyalı millət vəkili Nadir Qazipura ölkəmizin ictimai-siyasi dairələri dəstək verməli, onun bu təşəbbüsünü dəstəkləməlidir: "Nadir Qazipur İran parlamentində öz milli kimliyi uğrunda cəsarətli çıxışlar edir. İranla dövlətlərarası əlaqələrimizin normal müstəvidə olmasına baxmayaraq, ictimai-siyasi dairələr Nadir Qazipurun Azərbaycan dili uğrunda mübarizəsinə dəstək verməlidir”.
İsmayıl
