Son vaxtlar Azərbaycanın tarixi torpaqları olan İrəvan, Göyçə, Zəngəzurla bağlı məsələlərin aktuallaşması, ölkə başçısının YAP qurultayında bu torpaqlara qayıtmağın vacibliyini bəyan etməsi məlum istiqamətdə daha ciddi və ardıcıl addımlar atılacağını düşünməyə əsas verir. Maraqlıdır, itirulmiş tarixi torpaqlrımızla bağlı medianın görə biləcəyi, görməli olduğu işlər hansılardır? Bu məsələdə medianın üzərinə hansı öhdəliklər düşür?
Moderator.az-a açıqlama verən "Şərq” qəzetinin baş redaktoru Akif Aşırlı məsələ ilə bağlı maraqlı fikirlər səsləndirib:
"Məsələ ondadır ki, bizim itirdiyimiz yalnız İrəvan, Göyçə, Zəngəzur deyil. Məsələn, Dərdənd də Azərbaycanın tarixi torpaqlarından biridir. Dərbənd bizim dövlətçiliyimiz tarixində mühüm əhəmiyyət kəsb edən elementlərdən biri olub. Bu baxımdan ölkə başçısı yalnız ötən əsrin 80-ci illərinin sonlarından etibarən Ermənistan və onun havadarları tərəfindən işğal edilən torpaqları deyil, əvvəlki dönəmlərdə itirilmiş torpaqlarımızın da geri qaytarılması ilə bağlı verdiyi konkret mesajlar təqdirəlayiqdir.
Irəvan şəhəri, onun ilkin etnik tərkibi, tarixi, buradakı maddi-mədəniyyət nümunələri, hansı ki, onların böyük əksəriyyəti ermənilər tərəfindən məhv edilib – bu və digər faktlar, tarixi sübutlar bu şəhərin Azərbaycana məxsusluğunun isbatıdır.
Bu problem bir neçə ildir ki, ölkə tarixçiləri qarşısında bir vəzifə kimi qoyulub. İrəvan və digər itirilmiş torpaqlarımızın tarixi ilə bağlı kitablar yazılıb. Tarixçilərimiz bu istiqamətdə işlərini bu gün də davam etdirir. Bununla yanaşı, medianın da bu məsələni diqqətdə saxlamasına çox böyük ehtiyac var. Çünki məhz media maarifçilik funksiyasını öz üzərinə götürüb.
Mətbuatın bu məsələni sistemli şəkildə gündəmdə saxlaması olduqca vacibdir və bu, dövlətçilik, milli maraqlar baxımından mühüm əhəmiyyət kəsb edir ”.
