"Bakıda və bölgələrdə yüzlərlə məscid əsaslı şəkildə bərpa olunub”. Bunu ötən gün Prezident İlham Əliyev mədəniyyət və incəsənət xadimlərinin bir qrupu ilə görüşü zamanı deyib. Dövlət başçısı ötən illər ərzində mədəniyyət və incəsənət sahəsində xeyli işlərin görüldüyünü, ciddi nailiyyətlər əldə olunduğunu və mühüm qərarların verildiyini bəyan edib: "Dini abidələr əsaslı şəkildə təmir edilir. Onların arasında böyük mənəvi əhəmiyyət daşıyan Təzəpir, Bibiheybət, Əjdərbəy məscidləri, Gəncədəki İmamzadə dini-tarixi kompleks, Azərbaycanın ən qədim məscidi - 743-cü ildə tikilən Şamaxı Cümə məscidi əsaslı şəkildə bərpa olunub. Heydər Məscidi tikilib. Yəni, bunlar bizim milli irsimizdir”. Dövlət başçısı yeni islahatlar barədə də danışıb. Prezident vurğulayıb ki, Azərbaycan yeni inkişaf mərhələsinə qədəm qoyur və bütün sahələrdə olduğu kimi mədəniyyət sahəsində də ciddi islahatlar aparılır.
Dövlət başçısının diqqət çəkdiyi məsələni "Sherg.az”a dəyərləndirən AMEA-nın əməkdaşı, ilahiyyatçı-alim Əkrəm Həsənov bildirib ki, dövlət başçısı hər zaman Azərbaycanın milli və dini dəyərlərinə böyük hörmət və ehtiramla yanaşıb:
"Prezident İlham Əliyevin bütün addımları xalqın rifah halının yüksəlməsinə, təhlükəsiz yaşamasına, öz milli və dini adət-ənənələrini rahat şəkildə yerinə yetirməsinə hesablanıb. Dövlət başçısı islam dininə çox böyük diqqət və hörmət göstərir. Prezidentimiz də, birinci vitse-prezidentimiz Mehriban xanım Əliyeva da inanclı insanlardır. Hamımız bilirik ki, dövlət başçısı ailəsi ilə birgə müqəddəs Həcc ziyarətində olub, orada namaz qılıb.
Yeni məscidlərin tikiliməsi, yüzlərlə ibadət evinin təmir edilməsi, o cümlədən İlahiyyat İnstitunun yaradılması da dövlətin dinə, inanclı kəsimə göstərdiyi qayğının təzahürüdür. İnstitun yaradılmasında məqsəd odur ki, ölkəmizdə elmli, savadlı, müasir baxışlı ilahiyyatçılar yetişsin. Onlar insanlara dini, mənəviyyatı doğru-dürüst şəkildə, nağıllar danışmadan çatdırsınlar. Bunun üçün dövlət tərəfindən kifayət qədər maliyyə də ayrılıb.
Həmçinin, hər il QMİ-yə maddi vəsait ayrılır. Məscid imamlarına maaş verilir. Hətta bəzi imamlara avtomobillər paylanılır. Eyni zamanda dövlətin maddi dəstəyi ilə yeni dini ədəbiyyatlar nəşr olunur. Yəni demək istədiyim odur ki, Prezidentimiz dini dəyərlərə böyük diqqət göstərir”.
İsmayıl
