Artıq Yeni il bayramını yola salmışıq. Hər il olduğu kimi bu dəfə də paytaxtda yaşayanlar öz rayonlarına üz tutdular. Ənənəvi olaraq yenə vətəndaşlar biletlərin qiymətindən narazılıq edirlər. Əslində haqqları da var. Belə ki, adi günlərdə 10-12 manata olan biletlər bayramlarda sərnişinlərə iki dəfə baha qiymətə satıldı.
Kiçik araşdırmamız nəticəsində məlum oldu ki, bilet dəllalları olan sürücü və köməkçiləri hər bayramda olduğu kimi, yola saldığımız bayramda da öz “işlərini” gördülər.
Belə ki, sürücülər əvvəlcədən kassalardan biletləri normal qiymətə alır, sonradan sərnişinlərə iki, bəzən üçqat qiymətə satırlar. Kassalardan bilet tapmayan vətəndaşlar isə məcburiyyət qarşısında olun həmin bilet “tacirləri”nə üz tutur.
Bunun qarşısının niyə alınmadığını Bakı Beynəlxalq Avtovağzalından soruşmağa cəhd etdik. Amma qurum rəsmilərindən heç birizənglərimizə cavab vermədilər.
İqtisadçı: “Nə qədər ki, belə əməliyyatlarda insan faktoru var, problem konkret olaraq aradan qalxmayacaq”
İqtisadçı ekspert Fuad İbrahimov isə deyir ki, bu hallar dünyanın bütün ölkələrində var. O, Sherg.az-a bildirib ki, ən müxtəlif ölkələrdə belə tendensiyalara rast gəlmək mümkündür:
“Nə qədər ki, belə əməliyyatlarda insan faktoru var, problem konkret olaraq aradan qalxmayacaq. Bu, hər zaman belə olub. İnsanlar həmişə nə olursa, olsun öz gəlirlərini artırmağa çalışırlar. Məsələni kökündən və birdəfəlik həll etmək üçün mütləq elektron sistemə keçirilməlidir. Bu, həm rahatlıq, həm də maddiyat baxımından sərfəlidir”.
“Gündəlik olaraq “ASAN-ın xidmətlərindən istifadə edən yeniyetmə və gənclər birdən-birə əvvəlki dövrə qayıtsalar, bəlkə də, dəli olarlar”
Elektron sistemin zəruriliyindən danışan ekspert fikrini ASAN Xidmətin timsalında izah edib:
“ASAN Xidmət fəaliyyətə başlayana kimi onun tərkibində olan bütün sahələrdə qanun pozuntuları olurdu. Məsələn yersiz növbələr, “şirinliklər” və s. İndi isə belə hallardan söhbət gedə bilməz. Çünki elektron sistemdə hər şey şəffafdır. Sizi inandırım ki, indiki dövrdə gündəlik olaraq “ASAN-ın xidmətlərindən istifadə edən yeniyetmə və gənclər birdən-birə əvvəlki dövrə qayıtsalar, bəlkə də, dəli olarlar. Deməyim odur ki, elektron sistemin böyük üstünlükləri var”.
Kənan Novruzov
