Xaricdən gətirilən avtomobillərin idxal dəyər 5 min manatadək artıb. Belə ki, bu ilin yanvar-iyun aylarında xaricdən Azərbaycana ümumilikdə 779 milyon 364 min dollar dəyərində 42 min 335 ədəd avtomobil gətirilib.
“Sherg.az” xəbər verir ki, Dövlət Gömrük Komitəsinin (DGK) statistikasına əsasən, 2023-ci ilin yanvar-iyun ayları ilə müqayisədə ölkəyə idxal olunan avtomobillərin sayı 6 min 38 ədəd azalıb, dəyəri baxımından 26 milyon 60 min dollar və ya 4% artıb. Bu dövrdə 1 ədəd avtomobilin idxal qiyməti 18 min 410 dollar, ötən ilin eyni dövründə isə 15 min 573 dollar olub. İdxal qiyməti son bir il ərzində 5 min manatadək artıb.
Avtomobil sektoru üzrə ekspert Eldəniz Cəfərov "Xəzər Xəbər"ə bildirib ki, avtomobillərin idxal dəyərinin artmasının səbəbi ili köhnə nəqliyyat vasitələrinin ölkəyə gəlişinin məhdudlaşdırılmasıdır.
Ekspert həmçinin vurğulayıb ki, idxal edilən avtomobillərin 9 minə yaxını hibriddir.
Nəqliyyat eksperti İlqar Hüseynli isə “Sherg.az”a deyib ki, xaricdən gətirilən avtomobillərin idxal dəyərinin artmasında bir çox amillər xüsusi rol oynayır:
.jpg)
''Bunlardan birincisi, gömrük ödənişləri zamanı 10 ildən yuxarı nəqliyyat vasitələrində tarif dəyişiklikləridir. İkincisi, bu illərə qədər köhnə avtomobillərin idxalına icazə verilirdi. Onların da dəyər qiyməti az olduğuna görə, idxalda fərq özünü göstərir. Həmçinin,ölkə ərazisinə daxil olan maşınların sayı da idxal dəyərinin artmasını şərtləndirir. Belə ki, artıq 2023-cü ilin yanvar-iyun ayları ilə müqayisədə ölkəyə gətirilən avtomobillərin sayı azalıb. Bu amil isə qiymətin qalxmasına gətirib çıxarır".
