İtaliyalı virusoloqlar ölkənin şimalında yeni koronavirusun daha iki müxtəlif ştammını müəyyən ediblər.
Bu barədə 360 TV xəbər yayıb.
Bildirilir ki, epidemiyadan ən çox zərər görmüş şəhərlərdən biri olan Berqamoda tapılan ştamm genetik ardıcıllığı və bir sıra xüsusiyyətlərinə görə, Lodi və Kremonada tapılanlardan çox fərqlidir.
O da məlum olub ki, fevralın 21-də ölkənin ilk “qırmızı zona” elan olunan şəhəri Kodonyoda aparılan araşdırmalar zamanı virusun yanvarın ortalarında artıq yayılmış olduğu öyrənilib. Bu, bəzi sakinlərdə ilin əvvəlində müəyyən olunan anticisimlər sayəsində məlum olub.
Daha bir maraqlı fakt isə Kodonyada anticisimlərin 23 faiz sakində tapılmasıdır. Berqamoda bu göstərici 57 faizdir. Ekspertlərin fikrincə, bu, Berqamonun Kodonyada iki həftə gec karantinə alınması səbəbindən baş verib.
Qeyd edək ki, İtaliyada bu günə qədər 241 611 nəfər koronavirusa yoluxub. Onlarlan 34 861-i ölüb.