“Rüşvət verib harada istəyirlərsə, orada bina tikirlər. Dünya təcrübəsi, yaşayış normaları yoxdur”
“Bu yaxınlarda qərar qəbul olundu ki binalar tikilərkən ətrafında kifayət qədər yaşıllıq, boş sahə olmalıdır”
“Görünür, bunlar yalnız kağız üzərindədir. Müvafiq orqanlar normativ qaydalara əməl edilmədiyini görürlər, lakin rüşvət götürərək məsələni ört-basdır edirlər”
Bakı şəhərində tikilən binaların bir qismi bir-birinə sıx tikilməsi ilə sakinlərin narahatlığına səbəb olur. Bu tikililərin insanların təhlükəsizliyi və sağlamlığı baxımından da mənfi cəhətləri çoxdur.
Məlum mənzərə ilə bağlı öz Feysbuk hesabında paylaşım edən “Sağlam Cəmiyyət Hərəkatı”nın ekperti, sosioloq Elçin Bayramlı qeyd edib ki, rüşvət Bakı şəhərində faciələrə səbəb olur:
“Şəhərdə xaotik durum yaranıb. Rüşvət verib harada istəyirlərsə, orada bina tikirlər. Dünya təcrübəsi, yaşayış normaları yoxdur. Bu yaxınlarda qərar qəbul olundu ki binalar tikilərkən ətrafında kifayət qədər yaşıllıq, boş sahə olmalıdır. Görünür, bunlar yalnız kağız üzərindədir. Müvafiq orqanlar normativ qaydalara əməl edilmədiyini görürlər, lakin rüşvət götürərək məsələni ört-basdır edirlər”.
Ekspert bildirib ki, vəziyyət düzəlmək əvəzinə pisləşir:
“Bayıl qəsəbəsində neftçi Qurban Abbasov küçəsində yolun hər iki tərəfindən çoxmərtəbəli binalar inşa ediblər. Bu da bir çox problemlərə yol açıb. Binalar tikilməmişdən öncə də maşınlar rahat hərəkət edə bilmirdi. Dar küçədir. Orada faciəvi vəziyyət yaranıb.
Bunun kimi nümunələr çoxdur. Bakıda dünya standartlarına cavab verən bina yoxdur. Yüksək bir yerdən şəhərə baxdıqda sadəcə çoxlu sıx düzülmüş beton yığını görünür.
Getdikcə vəziyyət düzəlmək əvəzinə pisləşir, çünki heç bir orqan məsuliyyət daşımır, cəzalandırılanlar yoxdur, kimin kefi nə istəyirsə, onu da edir. Şəhərdə avtomobillə hərəkət etmək mümkün deyil, kommunal sistemlər davam gətirmir, parkinq yerləri yoxdur, uşaqların oyun meydançaları mövcud deyil.
Məsələdən Dövlət Şəhərsalma və Arxitektura Komitəsi, Bakı Şəhəri İcra Hakimiyyəti (BŞİH), Fövqəladə Hallar Nazirliyi (FHN) və başqa müəyyən orqanlar məsuliyyət daşıyır. Bu vəziyyətə rüşvət alınması səbəb olur”.
Xanlar Əlibəy
