Uşaqlar üçün satılan "Bolluq LTD" MMC-nin məhsulunun içindən dəmir parçası çıxması ilə bağlı məsələ Azərbaycan Qida Təhlükəsizliyi Agentliyi (AQTA) tərəfindən nəzarətə götürülüb.
Oxu.Az-ın sorğusuna cavab olaraq qurumdan bildirilib ki, agentliyin müvafiq regional bölməsi tərəfindən araşdırmalar aparılır.
Araşdırmaların nəticələrinə uyğun olaraq qanunamüvafiq tədbirlər görüləcək.
Qeyd edək ki, uşaqlar üçün satılan "Bolluq LTD" MMC-nin məhsulunun içindən dəmir parçası çıxıb.
Bu barədə sosial şəbəkədə məlumat paylaşılıb.
Sosial şəbəkə istifadəçisi bu hərəkəti diqqətsizlik və məsuliyyətsizlik adlandırıb.
Azad İstehlakçılar Birliyinin rəhbəri Eyyub Hüseynov "Sherg.az"a bildirib ki, əgər qida məhsulunun içərisindən kənar cisim aşkar olunursa, bu, istehsal prosesində gigiyenik normalara əməl edilmədiyini göstərir və müəssisədə sanitar-gigiyenik vəziyyətin qənaətbəxş olmadığını sübut edir:
“Bununla yanaşı, bəzən bu cür hallar birbaşa istehsal müəssisəsinin fəaliyyəti ilə bağlı olmaya da bilər. Belə ki, bəzən istehsalçı müəssisədən uzaqlaşdırılmış şəxslər və ya bazarda rəqabət aparan digər şəxslər tərəfindən bu cür hallar məqsədli şəkildə törədilə bilər. Məsələn, bir neçə il öncə bir çörək istehsalçısının məhsullarının içərisində insan tüklərinin aşkarlanması faktı araşdırılmış və nəticədə bəlli olmuşdur ki, bəzi şəxslər saçları iynəyə keçirərək çörəyin içinə yerləşdirir, daha sonra məhsulu şantaj məqsədilə ictimailəşdirərək maddi qazanc əldə etməyə cəhd göstərirlər. Bu qrup vaxtilə ifşa olunub. Əgər “Bolluq” MMC tərəfindən istehsal olunan məhsulun içərisində metal cismi aşkar edilibsə, bu, qəbuledilməz haldır və müvafiq dövlət qurumu -Azərbaycan Qida Təhlükəsizliyi Agentliyi tərəfindən araşdırılmalı, müəssisədə təcili sanitar nəzarət və monitorinq tədbirləri həyata keçirilməlidir. Belə hallarla qarşılaşan istehlakçılar məhsulun alışını təsdiqləyən kassa çekini mütləq şəkildə saxlamalı, məhsulun alındığı məkan barədə dəqiq məlumat verməli və müşahidə olunan faktı anonim olaraq sosial şəbəkələrdə yaymaqla yanaşı, rəsmi qurumlara, xüsusilə də Qida Təhlükəsizliyi Agentliyinə 1003 nömrəli qaynar xətt vasitəsilə müraciət etməlidirlər”.
