Ermənistan müxalifətinin nümayəndələri elan ediblər ki, 7 avqustda yerli vaxtla saat 16:00-da Vaqarşapatdakı məhkəmə binasının qarşısında toplaşaraq bütün ermənilərin katolikosu II Qareginə və məhkəmə qərarının icrasına mane olmaqda ittiham olunan altı yepiskopa dəstək ifadə edəcəklər.
Teleqraf xəbər verir ki, bu barədə erməni mediası məlumat yayıb.
“Sabah parlamentdə olmayacağıq. Saat 16:00-da həmvətənlərimizlə birlikdə Vağarşapatda olacağıq ki, dini hisslərimizlə oynamağın nəticələrinin nə olduğunu görsünlər. Sabah mən Eçmiədzin məhkəməsinin qarşısında olacağam”, - deyə “Güclü Ermənistan” müxalifət fraksiyasının rəhbəri Narek Karapetyan bildirib.
Müxalifətdəki "Ermənistan" fraksiyasının rəhbəri Anna Qriqoryan da məhkəmə binasına gəlmək niyyətini açıqlayıb.
"Ermənistan" fraksiyası məhkəmə prosesində iştirak edəcək. Sessiyanın müxalifət vitse-spikeri seçilməsi ilə bağlı olduğunu nəzərə alaraq, iclasın davam etməsini təmin etmək üçün səhər tezdən parlamentə gələcəyik. Bundan sonra məhkəmə prosesində iştirak edəcəyik", - deyə o bildirib.
Çiçəklənən Ermənistan Partiyasının mətbuat xidməti üzvlərin ruhaniləri dəstəkləmək üçün məhkəməyə gələcəyini açıqlayıb.
Bəyanatda deyilir: "Bu çətin dövrdə milli və mənəvi dəyərlərimizi, Ermənistan dövlətçiliyinin və milli kimliyinin sarsılmaz təməllərini müdafiə etmək üçün Erməni Apostol Kilsəsinin yanında olmaq bizim borcumuzdur".
