Mayın 26-da Ermənistan parlamentinin sədri Alen Simonyan Qırğızıstan parlamentinin sədri Nurlanbek Turqunbek Ulunu qəbul edib.
Teleqraf xəbər verir ki, tərəflər arasında təkbətək görüş keçirilib.
Təkbətək söhbətdən sonra nümayəndə heyətlərinin geniş tərkibdə görüşü keçirilib, görüşdə ikitərəfli gündəliyə aid müxtəlif məsələlər, xüsusilə parlamentlərarası əməkdaşlıq, eləcə də iki ölkənin parlamentlərində fəaliyyət göstərən dostluq qrupları arasında əlaqələrin fəallaşması vurğulanıb.
Alen Simonyan Ermənistan və Azərbaycan arasında artıq başa çatdırılmış sülh sazişi layihəsinə toxunaraq, İrəvanın onu imzalamağa hazır olduğunu qeyd edib.
Qırğızıstan parlamentinin rəhbəri qeyd edib ki, Bişkek Ermənistan və Azərbaycan arasında sülh sazişinin imzalanması üçün platforma təqdim etməyə hazırdır.
Görüşün sonunda Ermənistan və Qırğızıstan parlamentləri arasında əməkdaşlıq memorandumu imzalanıb.
