Fələstinin HƏMAS hərəkatı ABŞ Prezidenti Donald Trampın son bəyanatlarından sonra ərəb liderlərini Qəzza zolağındakı vəziyyətlə bağlı təcili toplantı keçirməyə çağırıb.
Teleqraf xəbər verir ki, HƏMAS nümayəndəsi Hazem Qasemin müvafiq bəyanatı hərəkatın teleqram kanalında yerləşdirilib.
"Biz Trampın bəyanatlarını qətiyyətlə rədd edirik. Qəzza yalnız onun sakinlərinə məxsusdur və onlar oranı tərk etməyəcəklər. Bununla əlaqədar biz ərəb ölkələrinin başçılarından təcili toplantı keçirməyi və fələstinlilərin zorla çıxarılması planlarına qarşı çıxmaq yollarını müzakirə etməyi tələb edirik", - Qasem belə deyib.
O, həmçinin bütün Fələstin fraksiyalarının nümayəndələrini köçkünlük cəhdlərinə müqavimət göstərmək üçün birləşməyə çağırıb.
Xatırladaq ki, fevralın 4-də Donald Tramp Ağ Evdə danışıqlardan sonra Benyamin Netanyahu ilə birgə mətbuat konfransında Vaşinqtonun Yaxın Şərqdə sülhün bərqərar olması naminə onu inkişaf etdirmək üçün Qəzza zolağına uzunmüddətli sahiblik etməyi nəzərdən keçirdiyini bildirib. Ərəb ölkələri, İran və bir sıra Qərb dövlətləri Trampın bu ideyasına qarşı çıxıblar.
