Əminəm ki, Vladimir Putin və Vladimir Zelenski razılığa gəlməyə hazırdırlar.
Bunu ABŞ Prezidenti Donald Tramp deyib.
O bildirib ki, Avropa Putinlə qarşılıqlı əlaqədə uğur qazana bilməyib, amma mən bu məsələdə nəticə əldə edə biləcəyimə əminəm.
Politoloq Zeynal Əmrəliyev “Sherg.az”a deyib ki, Amerika Birləşmiş Ştatları və Rusiya arasında hazırda dialoq davam edir:
“Rusiya prezidentinin xüsusi nümayəndəsi Kirill Dmitriyev Vaşinqtonda ABŞ rəsmiləriylə görüş keçirdi. Həmin görüşdən sonra isə müəyyən mənada müsbət mesajlar verildi. Rusiya tərəfinin mövqeyində yumşalmalar müşahidə olunur. Eyni zamanda Amerikanın Rusiyaya qarşı mülayim mövqeyi əvvəldən bəlli idi. Bayden Administrasiyasına nisbətən Trampın mövqeyində Rusiyaya qarşı bir qədər yumşalma var. Tramp çalışır ki, Amerika və Rusiya arasında ikitərəfli əlaqələr bərpa olunsun. Dünənki görüşdən sonra Rusiya prezidentinin xüsusi nümayəndəsi açıqlama verdi ki, Rusiya ilə ABŞ arasında Ukrayna savaşından bu yana bağlanan hava əlaqələri açıla bilər. Amerikanın iş adamları Rusiyada Avropa tərəfindən tərk olunan sahələrə investisiya qoymağa hazır olduqlarını söyləyirlər. Görünən odur ki, Tramp Rusiya bazarına daxil olmağa hazırlaşır. Şübhəsiz ki, ABŞ və Rusiya arasında ikitərəfli münasibətlər bərpa olunacaq. Məlum olduğu kimi sözügedən ikitərəfli münasibətlərin yaxşılaşması Rusiya-Ukrayna savaşı ilə bağlıdır. Rusiya tərəfi qalıcı atəşkəs müqaviləsinin olması üçün öz ölkəsinə investisiya qoyulmasına çalışacaq. Avropa ölkələri indiyə qədər Rusiya ilə müəyyən mənada qalmaqal yaşayırdılar. Ancaq Amerika Tramp dövründə Rusiya ilə əlaqələri yaxşılaşdırmaq yönündə addımlar atacaq”.
