Fransa və Rusiya arasındakı ziddiyyətlərin Azərbaycana münasibətdə də müəyyən əks-sədası hiss olunur
Təbii ki, bu hal Fransa hakimiyyətinin onsuz da gərginləşdirdiyi ikitərəfli münasibətlərimizi daha da ağırlaşdırır.
Bunu Kreml sözçüsü Dmitri Peskov aprelin 6-da Parisin Şarl de Qol hava limanında baş vermiş hadisəni şərh edərkən deyib.
Onun sözlərinə görə, Fransa hakimiyyəti uzun müddət saxlanılan şəxsin yanına konsulluq xidmətinin əməkdaşlarını buraxmayıb. Bu isə beynəlxalq öhdəliklərin birbaşa pozulmasıdır.
Qeyd edək ki, daha öncə də Rusiya Xarici İşlər Nazirliyinin əməkdaşının Paris hava limanında saxlanması ilə bağlı Fransa səfiri XİN-ə çağırılıb.
Siyasi şərhçi Əziz Əlibəyli "Sherg.az"a bildirib ki, Fransa və Rusiya arasında münasibətlərin gərginləşməsinin başlıca səbəbi Afrika cəbhəsində baş verən proseslərdir:
"Son illərdə Fransanın təsir dairəsindən çıxan bir sıra Afrika ölkələrinə Rusiya və Çin birlikdə daxil olaraq hərbi mövcudluq yaratmağa başlayıblar. Bu isə bölgədə geosiyasi mübarizəni daha da qızışdırır. Xüsusilə Rusiya hərbi bazalar qurmaqla həmin ölkələrdə təsirini gücləndirir və proses getdikcə daha geniş miqyas alır. Bu qarşıdurmanın yan təsirləri təkcə Afrikada deyil, Cənubi Qafqaz regionunda da özünü göstərir. Fransa və Rusiya arasındakı ziddiyyətlərin Azərbaycana münasibətdə də müəyyən əks-sədası hiss olunur".
Şərhçi əlavə edib ki, Avropanın taleyi onun mərkəzçilik prizmasından baxanda sual altında qalması məsələsi Ukrayna müharibəsindən sonra daha da aktuallaşıb:
"Avropanın birliyinin və mərkəzçi yanaşmasının sual altına düşməsi bu iki dövlət arasında rəqabəti daha da artırdı. Bütün bu gərginlik fonunda situativ olaraq casus qalmaqalları, müəyyən diplomatik əməkdaşların saxlanılması və ya ölkədən çıxarılması kimi hallar da bu qarşıdurmanın nəticəsi kimi ortaya çıxır".
