Ukraynanın Sumı vilayətində dron operatoru kimi xidmət edən britaniyalı könüllü Ben Leo Burgess həyatını itirib. O, 2022-ci ildə Rusiyaya qarşı döyüşmək üçün Ukraynaya gəlmişdi. 33 yaşlı hərbçi 20 iyun tarixində Sumının Andriivka kəndində ölüb.
Sherg.az xəbər verir ki, Ukrayna ordusundakı digər ingilis könüllü onu "ən yaxşı pilotlardan biri" kimi xatırlayıb və “o, bu müharibədə mənim ən böyük itkimdi” deyib.
Burgess üçün Kiyevdə vida mərasimi keçirilib. Tabutuna Britaniya və Ukrayna bayraqları sərilib. Maidan Meydanında onun xatirəsinə bayraq sancılıb.
Britaniya Xarici İşlər Nazirliyi də ailəyə dəstək verdiklərini açıqlayıb. Burgessin öldüyü bölgədə son həftələr ağır döyüşlər gedir.
